Financial literacy intawhkhawm buatsaih

Tourism department leh Ministry of Corporate Affairs hnuaia Investor Education and Protection Fund Authority (IEPFA) chuan nimin khan Vanapa Hall-ah State Level Conference on Financial Literacy in Amrit Kaal an buatsaih a, Tourism minister Robert Romawia Royte-in a hmanpui.

Robert Romawia Royte chuan, sum peipunna lam hawi inzirtirna Mizoram mipuiin an mamawh thu sawiin, "Ziak leh chhiar thiamah Mizoram chu India ramah a ṭha ber pawl a ni a, sum leh pai lama thiamna financial literacy-ah a hniam páwl a ni thung. Financial literacy kan mamawhna sanzia a lang chiang hle," a ti.

Hmasawnna ngêlnghet leh tluantling nei thei turin financial literacy lama hriatna tihpun a ṭul thu sawiin Minister chuan, "Tunlai khawvel inelna sang tak hi thiamna leh hriatna neite tan chona a ni a, inzir peihte tan hlawhtlinna ropui tak chhar theihna a ni," a ti bawk.

Tourism Minister hian 75 Iconic Investor Awareness Programme (IAP) for Mizoram leh Niveshak Didi a hawng a; Mizoram hmun hrang hrang 75-ah financial literacy campaign hi chhunzawm zel tur a ni.

Inkhawmah hian chief secretary Dr Renu Sharma pawhin thu a sawi a, hmeichhe pathum hnenah Niveshak Didi pualin certificate hlan a ni. Vanapa Hall kawt aṭangin Investor Awareness Van - Niveshak Sarathi vailiam a ni bawk.