MNF sorkar duh loh lantirna atan Congress party-in poster 15,000 an târ

Congress party chuan MPCC Action Committee huaihawtin nimin khan Mizoram hmun hrang hrangah MNF kaihhruai sorkar duh lohna leh Zoram chhan chhuahna poster tàr hnatlang an buatsaih a; khaw 150 chuangah poster tam tham tak an tár.

Poster tàr hnatlang hi Aizawl bakah district khawpui leh Assembly constituency hrang hrangah a rualin buatsaih a ni a; khaw danga poster tàr hun hmanpui turin Aizawl aṭangin Congress party hruaitute an zin chhuak a ni. Aizawl leh khaw dang 150 chuangah poster 15,000 vel târ a nih thu MPCC chuan an tarlang.

Aizawlah chuan Transport directorate kawtah poster târ hnatlang hawnna inkhawm buatsaih a ni a; MPCC vice president Lal Thanzara chuan thu sawiin, MNF-in SEDP hnuaiah Rs 3,00,000 sem an intiam laiin, an sorkar aṭanga kum 4 hnu thlenga thil awm dan chu a beidawnthlak tak zet tih a sawi a, "Mizoram pumah poster tàr hnatlang kan nei ta hial a ni," a ti.

Lal Thanzara chuan, Lengpui Airport-ah sum tam tak a awm tih an hriat avangin an duh anga an suasampui theih tur Aviation Principal Consultant atan MNF sorkarin an dah tih sawiin, "Airport enkawltu turte pawh a nghet lo hlira dah an ni. CM-in Lengpui Airport chei ṭhat hna a tlawh tlut tlut a, hna thawk tura a thlan chu hnam dang Kamrula Chhangte leh CM tupa an ni. An hmanraw hmante a ṭha lo hle a, bungrua an tichhe nasa hle bawk," a ti a; Airport enkawltu officer-te leh hna thawktute rilru a nat thu a sawi

MPCC Vice President chuan, health care scheme-ah inenkawlna atan SEDP aṭangin chhungkaw pakhat tan Rs 2,00,000 dah a nih thu CM-in a puang tih sawiin, "Health care bill pek theih loh cheng vbc. 65.9 a awm a, damlo apiangte hman atana SEDP health care Rs 2,00,000 an dah chu khawiah nge?" a ti.

Sum enkawla MNF sorkar hlawhchhamzia sawiin Thanzara chuan, "Mizoram sorkarin leibá a ngah em em a, pûk tur an zawng reng. Sorkar hnathawkte'n a hunah hlawh an la thei lo a, pensioner-te'n pawisa an la thei lo a, damlote'n health care pawisa an dawng thei hek lo," a ti a; chuvang chuan Zoram chhan chhuahna poster târ hnatlang an nei a, Zoram chhan chhuah hna an thawh zel dawn thu a sawi.

Poster târ puala inkhawmah hian Aizawl District Congress Committee president Lalrobiaka, Congress Mahila president Vanlalawmpuii Chawngthu leh MPYCC president Dr Lalmalsawma Nghaka te pawhin thu an sawi a ni.