KHAWTHLIR

Union minister
Union Communication minister of state Devusinh Chauhan chuan vawiin hian Mizoram a rawn tlawh dawn a, Mizoram sorkar hotu te, tlawmngai pawl aiawhte leh mipui vantlang a theih ang angin a kâwm dawn bakah, sorkar laipui scheme hmanga hmalaknate a enfiah bawk ang.

KṬP-in thisen pe
KṬP, Kawnpui Venglai Branch chuan nimin khan KṬP Day pualin an kohhran sunday school hall-ah thisen pek huaihawtin, Kolasib District Hospital tan thisen unit 41 an pe a, petute mipa 23 leh hmeichhia 18 an ni. KṬP, New Serchhip Branch pawhin nimin vek khan KṬP Day pualin Serchhip District Hospital tan thisen unit 19 an pe bawk.

KṬP Day hmang
Nimin February 16 kha KṬP Day vawi 70-na a ni a, KṬP branch tam takin an lawm. KṬP Day pual hian branch tinin biak-in leh a chhehvelah KṬP flag an zâr a; branch tam tak chuan khawtlang/vantlang tana thil ṭha tihna hun atan an hmang a, branch ṭhenkhat chuan thisen an pe a ni. KṬP-ah hian branch 891 awmin, member 1,57,830 an awm a, member-te chu mipa 97,542 leh hmeichhia 60,288 an ni.

Raw chî leina
Horticulture changtu chief minister Zoramthanga chuan ZPM member Lalchhuanthanga zawhna ziaka chhángin, kum 2019 hnu lamah raw chi leina atan cheng nuai 648.16 hman a nih tawh thu a tarlang a; raw chî chu mi 2,014 chìntir an nih tawh thu a tarlang bawk.

Siaha DC thar
Siaha district bawrhsap thar Lalhmunsanga Hnamte, MCS chuan nimin khan kalchhuak Lalsangliana hnena aṭangin bawrhsap mawhphurhna a la. Lalhmunsanga hi 1998 batch a ni a, Siahaah hian kum 2004-2007 chhung election officer leh SDO (Sadar) a lo ni tawh a ni.

Kawng siam dawn
Chanmari kâwn aṭanga Israel Point inkar kawngpui, Electric Veng lam kawng thawm ṭhat a ni dawn a, vawiin aṭangin Chanmari kâwn leh Bara Bazar péng inkar kawngpui chu a chanve khâr a ni ang.