Sorkarin hmun 22-ah phûl lem a phah tawh

Sports & Youth Services minister Robert Romawia Royte chuan Mizoram sorkarin khelmual hrang hrang 22-ah phûl lem a phah tawh tih Assembly session neih mekah ZPM member Vanlalhlana zawhna ziaka chhángin a tarlang.

Sports Minister tarlan danin, Mizoram sorkarin phûl lem a phah tawhnate chu football khelmual 20 leh hockey khelmual pahnih - Kawnpui Hockey Ground leh Thenzawl Hockey Ground-ahte a ni a; football khelmual pakhatah chuan vawi hnih phah tawh a ni.

INC member Lalrindika Ralte zawhna ziaka chhángin Robert Romawia chuan, PMJVK hnuaiah Hachhek bial chhunga khua/hmun 10-ah basketball court siam a nih dawn thu a tarlang a; chungte chu - Kanhmun, Zawlnuam Bawrai, Zamuang, Rengdil, Sihthiang, Zawlnuam Vengpui, Kawrtethawveng, Zawlnuam College, Zampui Phuldungsei leh Zomuantlang te a ni.

SYS Minister tarlan danin, Basketball court pakhat tana sum ruahman chu nuai 102.59 zel a ni a, hna thawktu tur chu Junior Consultancy Services, Tlangnuam, Aizawl a ni. January 2024 hmain siam zawh vek tura tih a ni.

Sports Minister chuan, Hachhek bial chhunga khua/hmun 12-ah PMJVK hnuaiah volleyball court siam tur a nih thu te, court pakhat siamna atan cheng nuai 31.20 zel ruahman a nih thu te, hna thawktu tur chu Junior Consultancy Services a nih thute leh, January 2024 hmain siam zawh tur a nih thute a tárlang bawk.