Minister-in J Thankima College lawmpui

Higher & Technical Education minister Dr R Lalthangliana chuan nimin khan a pisaah tun hnaia National Assessment and Accreditation Council (NAAC) endiknaa A+ grade hmutu J Thankima College hotute a kâwm a, lawmpuina thuchei a hlân.

Dr R Lalthangliana chuan, J Thankima College-in NAAC grade C aṭanga A+ an hmu chu hlawhtlinna ropui a nih thu sawiin, "Grade hrang hrang pali zuan khûm thei khawpa hma an sawnna leh an tumruhna hi a chhuanawm a, Mizoram tihmelṭhatu an ni," a ti a; NAAC grade A hmu apiang lawmpuina hlan zel a tum thu a sawi.

J Thankima College principal Prof. JV Nunchunga chuan, an hlawhtlinna chu college-a thawkte leh zirlaite ṭanrualna vang leh, Higher & Technical Education department hotute'n theihtawp chhuaha ṭan an lâkpui vang a nih thu a sawi.

NAAC hian J Thankima College hi vawi thum an endik tawh a, vawi hnihnaah grade C (CGPA 1.67) an hmu a, vawi thumna, tun hnaia an endikah grade A+ (CGPA 3.31) an hmu a ni.

J Thankima College-ah hian subject pariat zirna a awm a, zirlai 1,000 chuang awmin, principal, zirtirtu 40 leh thawktu dang 12 an awm mek a ni.