Rualbanlote chungchang zirho a ni

Centre for Disabilities Studies leh State Commission for Persons with Disabilities chuan nimin khan Aijal Club-ah Awareness on Issues and Challenges of Persons with Disabilities in Mizo Society an buatsaih a, State Commission for Persons with Disabilities (SCPwD) chairman Vanlaldiki Sailo-in a hmanpui.

Vanlaldiki Sailo chuan, "Sorkar hna lâkah rualbanlote tan Rights of Persons with Disabilities, 2016 tlawhchhanin 4% dah a ni a, sikul admission tihnaah pawh 5% hial dah a ni tawh," a ti a; rualbanlote hamṭhatna atan pawl leh mimal ṭhahnemngaite thawhna rah seng mek a nih thu a sawi.

Inkhawmah hian Mizoram Blind Society, Gilead Special School, Thutak Nunpuite Team-a Pangpar Huan, Spastic Society of Mizoram, Shining Star Special School, Samaritan Blind School, Redeem Garden School, Spinal Cord Injury of Wheelchair Society aṭangin aiawh an tel a ni.

RUALBANLOTE TANA HMALAKNA ṬHENKHAT

* District tinah district Com-mittee on PwDs din a ni.

* NIELIT nen ṭang dunin mitdelte'n computer an zir theihna tur ruahman mek a ni.

* Gilead Special School-ah digital class room siam a ni a, autistic-te tan smart class room buatsaih mek a ni.

* SCPwD hmalaknain district pariatah rualbanlote data neih a ni tawh.

* Aizawl City Bus Owner's Association nen ṭangkawpin Aizawla bus service zawng zawngah rualbanlote ṭhutna hauh a ni a, seat hauh zawnah sticker bel a ni.

* MBSE-in tun hnaiah HSS zirlai mitdelte tan braille textbook a siam.