Kumin chhungin Champhai police-in Ruihhlo Rs 63,24,525 hû man tawh

Champhai District Narco Coordination Centre (NCORD) Committee chu nimin khan chairman James Lalrinchhana, DC hoin DC conference hall-ah an ṭhu a, hmalakna leh hmachhawpte an sawiho. January 1, 2023 aṭanga nimin thlengin Champhai district-ah ruihhlo Rs 63,24,525 hû man a ni tawh tih an tarlang.

Ṭhutkhawma tarlan danin, kuminah January 1 aṭanga February 16 thlengin Champhai police-te'n NDPS Act, 1985 tlawhchhanin thubuai 12 an ziak lut a, chumi kaihhnawihah chuan mi 17 an man a, an zinga pali chu ram dang mi an ni.

January 1 - February 16 chhung hian heroin gram 2,639.96, tualchhunga hralhnaa Rs 63,00,000 hû man a ni a; ganja kg 6.35 (Rs 9,525 hu) leh alprazolam mûm 450 (Rs 15,000 hu) an man bawk. Ruihhlo man zawng zawng hlut zawng chu tualchhunga hralhna anga chhûtin Rs 63,24,525 a tling.