Ailawng Branch YMA-in an khaw tui lâk A rûka la péngah PHE E-in-C an puh

YMA, Ailawng Branch chuan thuchhuah siamin, PHE department engineer-in-chief HC Lalnunzira'n Ailawng khaw tui lâk chu a rûkin hun rei tak chhung a la péng tih hmuh chhuah a nih thu an tarlang a, "He thilah hian Ailawng Branch YMA chuan a ṭul angin hma a la zel ang," an ti.

Ailawng Branch YMA president Zoramthanga leh secretary Ngurthantluanga hminga thu-chhuah chuan, HC Lalnunzira hian Ailawng ramah huan a nei a, Ailawng khawtlang tui lâk chu vantlang tanky thlen hmain ama thuin hun rei tak chhung a lo lâk pên thu leh, Ailawng WATSAN-in tui haw thei lo buaipuia an chhuina lamah tui a lak rûk chu February 15, 2023 khan hmuh chhuah a nih thu a tarlang.

Tui haw theih loh vanga hun rei tak chhung khawtlang an buai lai leh tui sem tur an neih loh laia a rûka tui lâk pèn a ni chu mak an tih thu tarlangin Ailawng YMA chuan, "Mak kan ti a, PHE Engineer-in-Chief tih atan àwm lo kan tiin, khawtlang min zah lohna lian takah kan ngai. Pu HC Lalnunzira hian Ailawng khaw chhung cluster aṭangin connection pangngai a la tho a, connection pangngai duh tâwk loa a rûk a rála thil a ti duh hi Ailawng khaw rama huan rawn nei tlâkah kan ngai lo," an ti a; a ṭul anga hmalak zel an tum thu an tarlang a ni.