Sum dinhmun siamṭhat CM-in a duh leh duh lohah a innghat - PC President

Peoples' Conference party president Vanlalruata chuan, Mizoram sum dinhmun siamṭhat chu Finance enkawltu chief minister Zoramthanga'n a duh leh duh lohah a innghat niin a sawi.

PC party-in nimina Mizoram budget thar an thlirhonaah Vanlalruata chuan, Mizoram sum dinhmun chu siamṭhat theih ngeia an ngaih thu sawiin, "A duh phawt chuan kan CM, Finance minister ni bawk Pu Zoramthanga hian kan ram sum dinhmun chhe zel hi a siamṭha thei a, a duh leh duh lohah a innghat," a ti.

Vanlalruata chuan, mipui phur tirit si lo leh mipuiin an chawi pangngai reng cháwi chungin chhiah lâk khawmah sorkarin ṭan la se ram sum indaih lohna zualpui sutkian theih tura an ngaih thu a sawi a, "Sorkar hian mipui aṭanga a lâk khawm pawisa mipuiin kan pek ngei si, sorkara lut si lo nia langte hi harsa lo takin sorkarah a seng khawm thei," a ti a; chutiang tura hmalak dan tur PC party-in an hriat thu a sawi bawk.