Thla thum hlawh la tawh lo DIET-a thawkte hlawh pe turin sorkar phût

Mizoram Pradesh Youth Congress Committee (MPYCC) chuan, Mizoram district hrang hranga District Institute of Education and Training (DIET)-a thawk mi 217-te'n thla thum chhung hlawh an la tawh lo tih tarlangin, a rang thei ang bera hlawh pe turin Mizoram sorkar an phût.

MPYCC chuan thuchhuah siamin, Mizo-rama district pariatah DIET a awm a, thawktu group A-ah mi 118 leh group B-ah mi 99 an awm mek tih an tarlang a; nikuma November leh December thla hlawh bakah, kumin January hlawh an la la lo tih sawiin, "Thla thum hlawh an la lo hi Mizoram sorkar chak loh vang a ni," an ti.

DIET-a thawkte'n hlawh an lâk theih loh vanga harsatna an tâwk chuan zirtir hna an thawhnaah nghawng ṭha lo a neih an hlauh thu sawiin Congress ṭhalaite chuan, "Mizoram sorkarin sum a enkawl thiam loh vanga heng harsatnate hi thleng chho zel a ni tih hi kan ngaihdan a ni," an ti a; hlawh pe thuai turin sorkar an phût a ni.