Kum 2022 chhungin Lunglei dist-ah Sikserh vei mi 2,890 hmu chhuak

Kum 2022 chhung khan Lunglei district-ah sikserh (malaria) vei mi 2,890 hmuh chhuah a ni a, sikserh vangin mi pahnih an thi. Kumin January thla chhungin sikserh vei mi 135 hmuh chhuah a ni tawh bawk.

Nimin khan Lunglei District Task Force for Elimination of Malaria an ṭhukhawm a, chairman Ramdinliani, bawrhsapin a kaihruai. Ṭhutkhawma tarlan danin, January-December 2022 chhung khan Lunglei district-ah thisen endik 36,551 zingah sikserh vei mi 2,890 hmuh chhuah niin, malaria Pf vei mi 2,356 leh Pv vei mi 534 an ni a, sikserh vang hian mi pahnih an thi a ni.

Lunglei district-ah hian sikserh bakah dengue leh chikungunya a darh thu tarlan a ni a; kum 2022 chhung khan thisen endik 754 aṭangin dengue vei mi 61 hmuh niin, thisen endik 132 aṭangin chikungunya vei mi 34 hmuh chhuah a ni.

Ṭhutkhawmah hian, Agriculture department chu kut hnathawktute hnenah a zau thei ang berin sikserh chungchangah awareness campaign kalpui se, an ti a; tui tling tihtlem a nih theih nana hma la turin PHE department an ruat a, kawng siam hna thawktu (labour)-te'n thosi lên an hman ngei theih nana hma la turin PWD an ruat bawk.