Dr Vanlalthlana private bill sawiho - Select Committee bawhzui turin dah a ni; 'Bill a put luh hi ka dream tawh a ni' - Chief Minister

Assembly budget session neih mekah nimin khan ZPM member Dr Vanlalthlana private member bill, The Mizoram Land Revenue (Amendment) Bill, 2023 sawiho a ni a, Assembly Select Committee-in a ṭul anga an bawhzui turin dah a ni. Chief Minister Zoramthanga chuan he bill put luh hi a lo suangtuah fo tawh ṭhin ang a nih thu leh a lo dream tawh ṭhin thu a sawi.

Bill pu luttu Dr Vanlalthlana chuan, a Bill chu Land Ceiling Act lam ni loin, progressive act a nih thu a sawi a, "Ram neih dan azira chhiah lâk rawtna a ni. Mi rethei nêkchêpna leh loneitute ram chhuhsak tumna lam a ni lo," a ti a; Bill chu pawm turin House a ngen.

Dr Vanlalthlana chuan, "Mi pakhatin ram an neih tamzia te, an sum chhehrelhna atan ram an lei nasatziate ka hre vein ka hria. Bank-ah pawisa an dah ngam lo a, a cash (pawisa fai)-in an kawl ṭha ngam bawk si lo a, ram an lei pawp pawp a, ram man an tisang a ni," a ti a; chutiang chu vên a ṭul thu a sawi.

Dr Vanlalthlana private bill thehluh sawihonaah hian House member ṭhahnem takin an sawi a, eptu member-te'n a nih anga pawm an duh thu an sawi laiin, rorel lai member-te chuan pawm rih loh emaw, Select Committee bawhzui tura dah emaw an duh thu an sawi thung.

House leader Zoramthanga chuan, Bill chu ṭha a tih thu a sawi a, "Bill a put luh hi ka dream tawh a ni a, a ṭha ka ti a, ka welcome em em... Ka vision ve ber a ni a, kum 10 tam ka ngaihtuah a ni a, hei lo hi chu kan ram tan ram siamna a awm lo. A taka kan tihhlawhtlin ngei theih nan hmachhawp ṭha ka ti," a ti a; chutih rualin, enfel tur tam tak a la awm thu a sawi.

Zoramthanga chuan, Bill chu Select Committee bawhzui tura dah ṭha a tih thu sawiin, "Select Committee turte pawh thlang ila, anni'n zir se. Inthlan kum a ni a, kan tifel hman lo a nih pawhin nakinah an rawn chhunzawm thei ang a, a foundation tal siam ila. A taka tihhlawhtlin ngei hi kan ram tan a ṭhain ka hria," a ti.

House Leader chuan, Bill-in a tum, mi hausate'n ram an neih vak vak a, mi rethei zawkte'n ram an neih mang si loh ang chi ven chu a ngaihtuah nasat tawh thu sawiin, "Party-in SEDP-a kan telh zingah pawh ka sawi nasa ve a. Kan ramin malsawmna min pek aṭanga tax kan pek tlem lutuk hi tihpun dan ngaihtuah a ngai. Progressive taxation system hi a solution (chinfelna) awm chhun ni in ka hria, income pawh nasa takin a tipung ang," a ti a; chutih rualin, ram chu hlawm (grade) hrang hrangah ṭhen a ngaih tur thu leh surveyor ngah a ngaih tur thu a sawi.

Land Revenue & Settlement minister Lalruatkima pawhin Bill chu ṭha a tih rualin, Select Committee kuta dah ṭha a tih thu a sawi a, "Tun dinhmunah chuan kan danah hian a awm sa reng a, fimkhur taka la en zui zel pawh kan tih tur leh tihmâkmawh a ni a, dan siamṭha turin kan insiamrem zel ang," a ti.

ZPM Legislature Party leader Lalduhoma chuan Select Committee en zui tura dah a rawt a, hemi chungchangah hian Duhoma chuan, "Kan sawi dan aṭangin ruling lamin min pass pui an tum lo tih a chiang a, chuvang chuan hnâwl tawp aiah Select Committee zir chian tura dah ka rawt a ni," a ti a; an duh ber aṭangin duh ber dawttuah a tawlh tih a sawi.