Union MoS-in Serchhip tlawh

Sorkar laipuia Tele-communications minister of state Devusinh Chauhan chuan nimin khan Serchhip a tlawh a, sorkar laipuiin hmasawnna tur hna a kalpuite ṭha taka tihhlawhtlin chu an duhthusam a nih thu a sawi.

Union Minister hi DC conference hall-ah sorkar hotu te, MJA, YMA sub-hqrs, Joint VC leh kohhran hruaitute nen an inkâwm a; Prime Minister-in hmarchhak hmasawnna a ngai pawi-mawh a, minister-te chu NE state tlawh vek tura a tih thu sawiin Devusinh Chauhan chuan, "Serchhip district-a central-in hmasawnna hna a kalpui mekte mit ngeiin ka hmuh a, hnathawhte hi ṭha taka tihhlawhtlin hi kan duhthusam a ni," a ti a, duhkhawp loh lai leh ṭan lak ngai lai a awm chuan a hnena thlen turin sorkar hotute a chah.

Devusinh Chauhan chuan, Postal service (dâk) tichak lehzual turin ṭan lak a nih tur thu te, India Post hnuaiah hamṭhatnate mirethei hnen thleng thei a awm thu leh chu'ngte chu ngaihvena chhawr ṭangkai tura mipui a duh thu te, internet connectivity tihhmasawn lehzual tum a nih thute a sawi bawk.

Inkawmhonaah hian Serchhip bawrhsap Nazuk Kumar, SP Stephen Lalrinawma leh additional DC Lalmuansanga Ralte ten Serchhip district dinhmun tlangpui an sawi a; inkawmho zawhah Minister hian Serchhip District Hospital leh Post Office a tlawh a ni.