Sorkar dang aiin tun sorkarah Samagra-te'n hlawh an la ṭha - Education Minister

School Education minister Lalchhandama Ralte chuan nimin Assembly session-ah, Federation of Mizoram Samagra Employees (FEMSE)-te'n tun sorkar kal mekah sorkar dang aiin hlawh an la ṭha zawk niin a sawi.

Zodintluanga Ralte-in FEMSE zawmtu pawl 10 zingah hlawh la thei lo an awm leh awm loh zawhna chhángin Education Minister chuan, "Hlawh la thei lo an awm lo. FEMSE hnuaia inziak lutte hian sorkar aṭangin an thawh hlawh a hun taka lak loh cháng an nei ve ṭhin," a ti.

Thla hnih/thumte hlawh an la lo ṭhin nia sawiin Zodintluanga chuan, "Thla hnih hnuahte an la, kuminah hlawh an la la lo," a ti a; an hlawh tur sorkar laipui aṭanga a lo thlen rualin rang taka pek theih a nih leh nih loh a zâwt.

Lalchhandama Ralte chuan, MNF sorkarah hlawh an lâk ṭhatzia hre chiangtu chu FEMSE hote an nih a rin thu sawiin, "Ministry dang ngaihtuah chuan an la ṭha hle. Ministry dangah chuan thla 4-6 te an la lo," a ti a; kar leh maiah kumin January leh February thla hlawh pek a nih tur thu a sawi.

School Education Minister chuan, Samagra-a thawkte chu an hlawh tihpun a nih avangin arrear leh increment-te chhût fel a ngai tih sawiin, "Tun ṭuma kan pe tlai hi chu an hrethiam em em. Kum 10-20 dawn hlawh ngai reng hlawhte sum leh pai harsatna karah an hlawh tihpunsak an ni," a ti.

Samagra-a thawkte chu an ngheh theih dan tur ngaihtuah mek a nih thu sawiin Lalchhandama Ralte chuan, "Hemi atan hian propsal siamin DPR-ah kan thehlut a, Cabinet pawhin kan thlir tawh," a ti a; ennawn leh deuh ngai a la awm thu a sawi.