Mizoramah rorelna dik a awm theih nan ṬKP-in hmalak an rél

Mizoram Ṭhalai Kristian Pawl (MṬKP) chuan nimin khan Tuipui-D BCM biak-inah MṬKP rorel vawi 69-na an nei a; Mizoramah rorelna dik a awm theihna atan hmalak an rél.

MṬKP rorel hi presi-dent R Lalrochama'n a kaihruai a, bial leh unit aṭangin palai 554 an tel. "Mizoramah tun aia rorelna dik a awm theih nan MṬKP-in hma la rawh se," an ti a; Mizorama ráltlânte MṬKP hminga ṭanpuina pek an rèl bakah, ṬKP unit tinte'n an remchan angin plastic waste chharna hun vawi khat tal neih an rêl.

Ruihhlo ṭhat lohzia inzirtir rawtna leh MṬKP-in ṬKP member-te intodelh tura zirtirna buatsaih ni se, tih chu an pawm a; budget atan cheng nuai 15 an pawm bawk.

ṬKP-ah hian pastor bial 92-ah unit 429 an awm a; member 47,224 awmin mipa 29,105 leh hmeichhia 18,119 an ni. Kum 2022 leh kumina rorel inkarah ṬKP member thi 150 an awm a, mipa 131 leh hmeichhia 19 an ni.