'CM kan dang lo' - Congress party; CM hnena trolley pek tum an ṭhulh

Congress party-in nimin khan chief minister Zoramthanga hnenah airport trolley pek an tum nia sawi a ni a; hetih lai hian, Mizoram Pradesh Congress Committee (MPCC) Action Committee chuan thuchhuah siamin, niminah chief minister Zoramthanga che vel tur an dan loh thu an tarlang.

Congress party-in Chief Minister hnenah trolley pek an tum nia sawi a nih avang hian police-te chu an inrálring a, Congress party mite dang turin Treasury Square-ah police eng emaw zat awmin, Assembly House bul kawngpui an dang a; mahse, Congress party chuan CM hnena trolley pek an tum chu an ṭhulh a ni.

MPCC hotute chuan nimin chhun dar 12 vel khan CM hnena trolley pek an tum chu ṭhulh rih a nih thu an puang. An ṭhulh chhan an sawiah chuan Govt. J Thankima College programme-a a kal loh chhanah Chief Minister-in Congress party-in dan an tum niin a sawi a, J Thankima College nena buaina neih ṭha an tih loh avang a ni.

MPCC Action Committee chuan, nimin chhun dar 12 khan J Thankima College (JTC)-in NAAC accreditation A+ an hmuh lawmna Vanapa Hall-a an neih turah CM Zoramthanga'n a hmanpui dawn tih JTC hotute'n MPCC president Lalsawta an hrilh a, an hun hman tur chu tibuai lo turin an ngen tih an tarlang.

JTC hotute ngenna chu MPCC President-in zahawm a tih avangin JTC hun hman tur chu tibuai thei turin MPCC Action Committee-in CM an dan dawn loh thu a lo hrilh nia sawiin MPCC Action Committee chuan, "MPCC President sawi angin vawiin (February 17)-ah Congress Bhavan-a political session neih ṭhin bak programme dang siam a ni lo. Congress party hian khawi hmunah mah mipui che vel tibuai turin programme a siam lo a ni," an ti.

Congress party chuan, JTC-in NAAC grade sang zawk an nei chu an lawmpui thu sawiin, a lawmna hun tluang taka an hman theih nan duhsakna an hlan a; "Hetih laia CM berin dâwt hmanga Congress-in an dan avanga JTC programme Vanapa Hall-a neih turah a kal thei lo anga a sawi hi dâwta inpuh hmingchhiatna a ni," an ti bawk.