KHAWTHLIR

Chakai la hralh lo
Fisheries minister K Lalrinliana chuan ZPM member Vanlalhlana zawhna ziaka chhangin, Kolasib Dûmlui zaua Fisheries department-in chakai farm a siam aṭangin chakai hralh a la nih loh thu a tarlang. Chakai farm kalpui zel a nih leh nih loh zawhna chhangin K Lalrinliana chuan, "Pilot project a nih avangin kalpui zel tlak a nih leh nih loh hi tun dinhmunah hriat mai theih a ni lo," a ti.

Bial hming thlâk turin hma la lo
GAD enkawltu chief minister Zoramthanga chuan MNF member Lalrintluanga Sailo zawhna chhangin, Mizoram MLA constituency hming tihdanglam emaw, thlâk emaw tumin sorkarin hmalakna a neih loh thu nimina Assembly session-ah House a hrilh.

Green-Ag budget
Green-Ag Project hnuaia Mamit Technical Support Group chu nimin khan an ṭhukhawm a; kum 2023-24 chhunga Project Annual Work Plan and Budget atana ruahman Rs 58,96,745 leh Green Landscape Management Plan (February-June) 2023 an pawm. Green Ag hnuaia hmalakna atan Pûkzíng, Pûkzíng Vengthar, Marpara North, Tuipuibari, Rajivnagar, Damparengpui, Tuirûm, Khawhnai, West Phaileng, New West Phaileng, Teirei/Hruaitluang, Phuldungsei leh West Phulpui te thlan a ni.

Sava bu pe
Association for Environmental Preservation chuan nimin khan UPC (NEI) General Headquarters, Mualpuiah Awareness Seminar & Installation of Artificial Nest Box programme an hmang a, UPC (NEI) hruaitute hnenah UPC General Heaqduarters huam chhunga dah tur sava bu siam chawp panga an pe nghal.

PYD inkhawmpui
UPC (NEI) ṭhalai pawl, Pentecostal Youth Department (PYD) Aizawl East District chuan nizan aṭang khan Zemabawk Vengpui biak-inah District PYD Conference vawi 29-na an hmang ṭan a, thupui chu 'Chak takin awm rawh u' tih a ni. Inkhawmpuiah hian vawiinah rorel a ni ang a, Pathianni zanah a ṭiak ang.

MSACS pisa lungphùm phúm
MINECO-a Mizoram State AIDS Control Society pisa sak tur, State Resource Centre for HIV/AIDS tia vuah chu nimin khan Health & Family Welfare minister Dr R Lalthangliana'n a lungphùm a phúm.
State Resource Centre for HIV/AIDS hi SIPMIU pisa bulah sak a ni dawn a, sum ruahman chu cheng nuai 400 niin, contract agreement amount chu nuai 392.23 a ni. Square metre 280.35-a zauin chháwng lia sak tura ruahman a ni a, a sakna tur sum chu Ministry of Development of North Eastern Region hnuaia North East Special Infrastructure Development Scheme aṭangin hmuh a ni.

Rúl tawlhtu man
Assam Rifles-te chuan February 16, Ningani khan Zokhawtharah Myanmar aṭanga dan loa tawlh luh rúl chi hnih - anaconda pahnih leh saphai (Burmese python) pali an man a; a kengtu Zokhawthar mi pathum - Hanneikhual, Sankhupmang leh Lalpeklawma bakah, Rosangpuii, Champhaite an man bawk. Rúl leh a kengtute hi Champhaia EFCC department hnenah an hlân a ni.

Thil zawrh phal lo
PWD executive engineer (Aizawl Road South) R Lalbiaksanga chuan nimin khan hriattirna chhuahin, Melthum Silaimuala kawng péngṭhuama hmun âwl lai, PWD kawngpui reserve area huam chinah thil zawrh phal a nih loh thu a tarlang. Hetih lai hian, Trinity Hospital bul island têa chawhmeh zuar ṭhu ṭhinte chu nimin ṭang khan an ṭhu tawh lo nia thu dawn a ni.

MADC draft roll
Kumina Mara Autonomous District Council (MADC) hnuaia VC inthlana hman tur electoral roll siamṭhatna tur draft electoral roll chu nimin khan district election officer Lalhmunsanga Hnamte, bawrhsapin DC Conference Hall-ah a tlangzarh. MADC-ah VC 99 awmin, chhungkua 11,968 an awm a, draft electoral roll-ah hian voter 42,891 awmin, mipa 20,711 leh hmeichhia 22,180 an ni.

Intlàn chhâwk hun tidanglam
Aizawl Traffic SP Rodingliana Chawngthu chuan nipui laia Aizawla lirthei intlàn chhâwk dan tur a tichhuak a, vawiin aṭanga September 29, 2023 thleng hman tur a ni.
Aizawla lirthei intlàn chhâwk hian lirthei zawng zawng - mimal, sorkar, bungraw phur, district dang lirthei leh state páwna lirthei register-te a huam a, intlân chhâwk hun chu zing dar 9:30 aṭanga tlai dar 6 thleng a ni ang. Inrinni, Pathianni leh sorkar chawlh (holiday)-ah intlân chhâwk a awm lo thung.

Táng enkawl dan tur sawiho
Kolasib DC John LT Sanga hoin nimin khan a pisaah Kolasib District Jail-a táng, damlo leh thi an awma hmalak dan tur leh tángte hriselna uluk zawka enkawl dan tur sawiho a ni a; District Jail-ah táng mipa 67 leh hmeichhia paruk, mi 73 an awm mek thu tarlan a ni.
District Jail Superintendent tarlan danin, Kolasib District Jail-a táng mi 73 zingah kut inthlâk emaw, thawktute aṭanga tihduhdahna emaw a awm àwm hriat a ni lo. Hriselna pan deuh leh damlote chu jail chhungah enkawl an nih bakah, a ṭul angin damdawi-inah enkawl ṭhin an ni.