Sorkarin thu dik sawi se, langtlang se - MPC President

MPC president Lalhmangaiha Sailo chuan, Covid-19 hripui lakah Mizoram mipui an him zelna tura sorkarin inkhàrkhip chhunzawm leh tura ruahmanna a peih leh ta chu lawm­awm a tih thu leh, sum chungchangah sor­karin thu dik puang se, langtlang se a duh thu a tarlang.

Lalhmangaiha Sailo hian May 16, Inrinni khan thuchah a tichhuak a, MNF party kaihhruai Mizoram sorkar chu sorkar ṭha, mipui rin ngam leh langtlang ni tura a duh thu sawiin, "Thu dik sawi se, langtlang se la. Mipuite'n ngaihṭha tak leh ngaihngam taka contribution kan pek theih nan, sum inkaihhruai dan felfai leh rinawm tak neih hi sorkarin a tih tur pawimawh ber a ni tih hria se ka duh," a ti.

MPC President chuan, Covid-19 vang­in, "Kan budget beisei pawh kan hmu dawn lo tih a lang thei," a ti a; chuvang chuan, Mizoramin sum a neih ang angte chu health leh agriculture lamah dah tam pawimawh thu leh sector hrang hranga sum dah vak a hun lo hlea a hriat thu a sawi.