Sorkar kal mek hi sumin a tibuai - ZPM Working President

18th February, 2023

ZPM working president K Sapdanga chuan nimin khan ZPM pisaa inkhawmah thu sawiin, Mizoram sorkar ding mek chu sumin a tihbuai thu leh suma lei sorkar a nih ber thu a sawi.

K Sapdanga chuan, "Kan sorkar kal lai mek hi bihchian chuan suma lei sorkar a ni ber a, sumin a tibuai a ni," a ti a; Congress leh MNF an insorkar chhâwk a, mipuiin ningin an paihthla leh ṭhin tih sawiin, "Tun ministry hi mipuite'n hun pek an tum tawh lo tih a hriat ta a, a chhan tam tak zinga a lian ber chu sum an âtchilh lutuk hi a ni. Sum hi an hlép rû mai ni loin, an thukrû a ni ber a, an cheziaah mipui lung a awi thei lo," a ti.

MNF sorkarah sorkar hnathawk hlawh lâk ní an sawn a ni ber tawh tih sawiin Sapdanga chuan, "Ni 15-a hlawh lâk a ṭhat thu an sawi a, a mak hle. Sorkar hnathawkte'n an hlawh behchhanin loan an la a, sorkarin hlawh lâk ní a sawn khan loan pek hun a insawn ve si lo a, a hun taka loan rûl thei loin an buai phah ṭhin a ni," a ti a; tun sorkar laka beiseina sang ber chu an chawlh hun a nih thu a sawi.

ZPM Working President chuan, Assembly session neih mekah Sports department fakna resolution put luh a ni tih sawiin, "MNF sorkar fak tumna leh Sports Minister fak tumna angin lang mah se, Sports Minister tihmualpho tumna niin a lang. Ruling party-te'n thiam takin resolution an pu lut niin a hriat theih," a ti.

Sports department-in sum an hmang tam hle tih sawiin Sapdanga chuan, "Minister hian a remhriatna bakah zâwl pachal tak a nei niin a rinawm. An sum hmanna UC (utilisation certificate) thehluh tur an nei lawi si lo a, project thar an thehluh pawh sorkar laipuiin an hnathawh hmasate chingfel phawt tura tiin a lo dang tlat a ni," a ti a; chu chu mipuiin an hriat loh avangin mipui hriata sawi chhuahna remchang atan ruling party-te'n resolution an pu lut nia a lan thu a sawi.

ZPM Working President chuan, budget session neih mekah ZPM MLA-te an chet ṭhat thu leh mipui aiawhin zawhna an zawh nasat thu a sawi a; ZPM chu mipui beisei sorkar siam tura an inbuatsaih mek thu a sawi bawk.