Laldenga kha ram hruaitu tura Pathian ruat; tun hnaiah thu dik lo an vaivir - MNF Adviser

MNF party chuan nimin khan an pisa, Mizo Hnam Rûnah chhung inkhawm an nei a, MNF adviser Lalrawnliana'n thu sawiin, MNF dintu Laldenga chu ram hruaitu tura Pathian ruat a nih thu leh, MNF ramhnuai sorkara vice president ṭhin Lalnunmawia diary chhuah aṭangin tute'n emaw thu dik lo an vaivir thu a sawi.

Lalrawnliana chuan, ramhnuai sorkarah Lalnun-mawia vice president a ni a, a fel hle nia a sawi rualin, 'Pathian leh kan ram tan' tihah hian famkim lohna lian deuh a neih avangin mipui thinlung a nei thei tlat lo niin a sawi a, "MNF mipui khan Pu Lalnunmawia kha a nungchang aṭang khan hruaituah kan pawm thei tlat lo a, Chin Hills beih pawh ama rawt chhuah a ni a, Pu Denga phei chuan, 'A ṭhenin kan vah laiin a ṭhenin min hâl khum a,' a ti nghe nghe a ni," a ti.

MNF Adviser chuan, "Lalnunmawia diary lo chhuah aṭanga tute'n emaw thu dik lo an vaivir hi a ṭha lo a, thu dik zawk mipuite'n kan hriat zel a ṭha a ni," a ti a; MNF party tan chhiatna tur a awm lo niin a sawi. "MNF Dumpâwl lo chhuah dan leh Pu Bualhranga te a dumpâwl an nih chhan chu Pastor Zairema aṭanga inṭan a ni," a ti bawk.

Lalrawnliana chuan, tunlaiin social media-a ram hruaitute beih vak vak ching ho chu khawtlang leh kohhrana chhawr tlâk an awm lo nia sawiin, "Khawvel hmun tinah ram hruaitute hian sawichhiat an hlawh nasa em em a, kan party President ngei pawh archuk tui lo khawpin an bei ṭhin," a ti a; an ṭhat vanga beih an nih thu a sawi.