Ration card varte tan buhfai man tihsan FCSCA dept-in duh

Food, Civil Supplies & Consumer Affairs (FCSCA) minister K Lalrinliana chuan, FCSCA department chuan ration card vár neite tan buhfai man tihsan an duh thu Assembly House a hrilh.

INC member Zodin-tluanga Ralte zawhna chhángin FCSCA Minister chuan, "Department aṭanga rawtna a luh avangin Cabinet-in lo en turin a ti a, Deputy Speaker kaihhruaina hnuaiah committee din a ni. Tunah hian NGO hrang hrangte nen sawiho mek a ni," a ti.

K Lalrinliana chuan, ration card várte tana buhfai man tihto an rawt chhan sawiin, "Buhfai hi kg. khat Rs 27.30-in kan lei a, Rs 15-in kan pe chhuak," a ti a, sorkarin buhfai manah sum a hloh nasat thu a sawi.

FCSCA Minister chuan, buhfai man tihto deuh an rawt mek laiin sorkar laipuiin buhfai man a tihto thu sawiin, "OMSS hmanga kg. khat Rs 24-a min pek ṭhin kha Rs 34-te'n min offer. Economic cost-ah phei chu kg. khat Rs 37 a ni tawh," a ti.