Buhfai bûk tling loah action lâk ṭhin a ni

Food, Civil Supplies & Consumer Affairs (FCSCA) minister K Lalrinliana chuan, buhfai bûk tling lo report an dawn chuan action lâk nghal zel ṭhin a nih thu House a hrilh.

INC member Lalrindika Ralte-in ration buhfai bûk tling loa pek chhuah ṭhin sorkarin a hriat leh hriat loh leh, tihtawp tumna a awm leh awm loh a zawhna chhángin Supply Minister chuan, "Bûk tling lo report kan dawn chuan kan finfiah a, action kan la ngei ngei ṭhin. Report a awm phawt chuan kan titawp ngei ngei," a ti.

MNF member K Laldawngliana zawhna chhangin K Lalrinliana chuan, January 2023 aṭangin NFSA-a inziak lut zawng zawng a thlawnin buhfai an pêk nghal thu a sawi a; tun dinhmunah Mizoram pumah buhfai qtl. 1,70,117.08 a awm thu a sawi bawk.