Minister-in New Market sak mek a tlawh

Commerce & Industries minister Dr R Lalthangliana chuan nimin zing khan Aizawl New Market-a bazar tur in pahnih sak mek a tlawh a, bialtu MLA Robert Romawia Royte, minister of state-in a ṭawiawm.

Dr R Lalthangliana chuan, in sakte chu mi tam tak chhawr tur a nih thu sawiin, a ṭha thei ang bera sak a ṭul thu leh sak zawh thuai a châkawm thu a sawi a; bazar sak mekah thawktute ṭawiawm zel turin khawtlang hruaitute a sáwm.

New Market-ah hian in pahnih - Smart City hnuaiah Aizawl City Centre leh Commerce & Industries hnuaiah City Centre Annexe sak mek a ni a; City Centre sakna atan cheng vbc. 41.59 ruahman niin, City Centre Annexe sakna atan cheng nuai 3,641.59 ruahman a ni.

Aizawl City Centre-ah dawr 1,105 a awm dawn a, four wheeler 31 leh two wheeler 79 dah theih tura ruahman a ni. City Centre Annexe-ah chuan dawr 135 a awm dawn a, hawker 180-189 vel awm thei tura ngaih a nih bakah, two wheeler 185 leh four wheeler 48 dah theih tura ruahman a ni bawk.