Mizoramin potential ṭha tak a nei, ram hausaah kan siam thei - CM

Chief minister Zoramthanga chuan February 18, Inrinni khan Serchhip College administrative building sak tur lungphùm a phúm. CM chuan, Mizoram chu hmasawnna tura theihna ṭha tak nei, ram hausaa siam theih a nih thu a sawi.

CM Zoramthanga chuan, hripui lêng a ziaawm hnuah sum harsatna karah sorkarin theihtawp chhuahin hna a thawk zel nia sawiin, "Mizoram hi thlirna ṭhenkhat aṭang chuan tlang ram, kalpawh harsa tak, tihhmasawn dawn pawha hautak tak anga ngaih theih ni mah se, hmasawnna potential ṭha tak a nei, ram min petuin min pek chhan a awm a ni tih ngaihtuahin, ram hausaah kan siam thei a ni," a ti.

Chief Minister chuan, Serchhipa hma­sawnna tura hmachhawp pawimawh tak tak awmte chu ṭha taka bawhzui a nih a, mi dang tan entawn tlak an nih ngei a beisei thu a sawi a; zirlaite chu ram hma­sawnna atan mi pawimawh tak tak vek an ni tih hria a, Pathian ṭih chunga nun uluk a, an tih tur ṭheuhah theihtawp chhuah zel turin a chah.

Serchhip College administrative building sak tur hi Special Assistance to States for Capital Investment (SASCI) aṭanga hmuh cheng nuai 650 hmanga sak tur a ni a, February 27, 2023-ah sak ṭan tur niin, kum hnih chhunga sak zawh tur a ni.

Lungphùm phùmna inkhawmah hian minister Lalrinawma, Serchhip bawrhsap Nazuk Kumar, adviser to CM C Lalramzauva, PWD engineer-in-chief C Lianhmingthanga, Serchhip College principal K Laldinpuii, Serchhip SP Stephen Lalrinawma leh sorkar hotu dangte an tel.