Airport trolley chungchang MNF-in sawiho an ngam lo - Zodintluanga

Congress Legislature Party (CLP) leader Zodin-tluanga Ralte chuan, Lengpui Airport-a luggage trolley chungchang Assem-bly House-a sawiho hlauah MNF MLA-te a puh.

Zodintluanga hian Assembly session neih mekah private member resolution, 'Ram dang zin mite leh ram chhung zin mite tana harsatna siam a, bungraw nawrna trolley tam tak hmanga tichhetu hi hrem ngei ni se, trolley an tihchhiat zawng zawngte hi thla khat chhungin a tharin thlak vek rawh se' tih a pu lut. Resolution hi February 17, Zirtawpni khan Assembly House-a sawiho tura chhawp zingah a tel a, mahse, sawiho hman a ni lo.

A resolution sawiho hman a nih loh chung-changah CLP Leader chuan thu­chhuah siamin, MNF MLA-te chu a resolu­tion sawiho an hlauh vanga amendment bill sawi kual lui vak vakah a puh.

Zodintluanga Ralte chuan, Lengpui Airport chu December 1995-ah Congress sorkar laia siam a nih thu sawiin, "Kum hnih leh thla hnih chhungin Congress sorkar lai vêk February 1998 khan zawh a ni. Enchhin ngai a tam avangin Congress sorkar laia hawn hman a ni ta lo a, MNF sorkar pian hnu lawk, December 2, 1998-ah hawn a ni," a ti.

CLP Leader chuan, March 10, 2022 tlai khan Lengpui Airport-a baggage make-up area zawmna tur sak mek a chim thu leh a satu contractor chu CM Zoramthanga fa chuam Kamrul-a (KR Construction) a nih thu tarlangin, "Hetiang taka hna ṭha lo vanga a chim lai hian MNF sorkar chuan a chim chhan a zir chiang duh miah lo," a ti a; MPYCC leh Mizoram First ten Lokayukta-ah FIR an thehluh thu a sawi.

Airport chungchangah Lokayukta-in Central Bureau of Investigation (CBI) ko lut turin thutlukna a siam tawh tih sawiin Zodintluanga chuan, "Mahse, kum hnih a liam hnuah pawh CBI koh luh a la ni lo. MNF sorkar hian Aviation Wing leh Lengpui Airport an enkawl dan chhui chian an hlau hle niin a lang," a ti.

CLP Leader tarlan danin, Lengpui Airport chhung leh a páwn lam cheiṭhat hna chu Zoramchhana (CM Zoramthanga tupa) leh KR Construction (Kamlova Chhangte / Kamrul Lashkar) hnenah dan loin, restricted tender hmanga pek a ni. Zoramchhana'n cheng vbc. 75.76 man a thawk a, KR Construction-in cheng vbch. 40.92 man a thawk thung.

Lengpui Airport siamṭhat hna thawktute'n passenger-te hman tur luggage trolley-te chu cement, iron rod leh bungraw hrang hrang thiar nan an hmang tih sawiin Zodintluanga chuan, "Official lam aṭangin an khap ngam lo. Official-te hian Kamrula an ngam lo a ni lo a, a phêna awm ram hruaitu lal tak an hlau zawk niin a lang," a ti.

Zodintluanga Ralte chuan, Airport cheiṭhat hna thawktute'n trolley an hman avangin a chhe nasa hle tih tarlangin, "Congress sorkar laia trolley 300-400 awm ṭhin kha 20 vel bak hman tlak a awm ta lo. Khualzinte'n harsatna an tâwk nasa a, phai lam chanchinbu thlengin tarlan a ni," a ti a, Mizoram tan a mualphothlak thu a tarlang.

CLP Leader chuan, Lengpui Airport chu MNF sorkarin an sawp chhe mai ang tih Congress party-in an hlau thu sawiin, "Induhsakna hleihluak tak vanga Tuirial Hydel Project an tihṭhuanawp dan te, Falkawna Referral Hospital an sawp chhiat duh dante ngaihtuahin, Lengpui Airport hi an sawp chhe leh mai ang tih kan hlau a ni," a ti.