ZPM party-in ZLP Secretary an chhuang

ZPM party chuan thuchhuah siamin, ZPM Legislature Party (ZLP) secretary Dr Vanlalthlana chu Assembly budget session-a a chêt danah an chhuan thu an tarlang a; ram leh hnam tana ngaihtuahna tak tak séng turin MLA-te an ngen nghal.

ZPM chuan, February 17, 2023-a Assembly session-ah Dr Vanlalthlana private bill put luh, 'The Mizoram Land Revenue (Amendment) Bill, 2023' chu sawiho hnuah Assembly Select Committee bawhzui tura dah a nih thu an tarlang a; nikuma budget session-ah pawh 'The Mizoram Private Transport Workers (Welfare) Bill 2022' a pu lut tawh tih sawiin, "Eptu member ni chunga a kum záwna private bill pu lut thei Dr Vanlalthlana taimâkna hi a fakawm a, kan chhuang tak zet a ni," an ti.

Eptu member bill a nih vanga rorel lai mekte'n an pawmpui duh lo anga lang ṭhin chu pawi an tih thu sawiin ZPM chuan, "Ram hmasawnna tur bill pawimawh tak tak pahnih a kum záwna pass loh a ni hian ram tana legislator ṭhahnemngaite inpekna a tipamhmai hle. Bill-te pass a nih loh nana dangtu rorel mek party-te hian mipui hma an ngai tak tak lo niin a hriat," an ti a, pawi an tih thu an sawi.

ZPM chuan, session atan ZPM MLA-te an inbuatsaih nasa a, mipui aiawhin zawhna an zâwt tam a, ṭhahnem an ngai hle tih an sawi a, "ZPM hi eptu pawl lian ber a nih angin mahni bial chauh ngaihtuah thei loin ram pum thu pawimawh tak tak an sawi chhuak a ni. House zahawmna vawn nun kawngah te, roreltu awm dan mawi ngaih pawimawhah ZPM MLA-te'n hma an hruai nasa a, an chhuanawm tak meuh a ni," an ti.

ZPM party chuan, budget session neih mek chu sorkar lai tan budget session hnuhnung ber tur a nih thu an tarlang a; ram mipuiin session uluk takin an thlir tih sawiin, "Sawihona pawimawh a awm laia nungchang mawi lo te, ṭawngkam chaltlai te, eptu member-te elsènna te, fiamthu nena khawsak chíng member ṭhenkhat an awm hian House a tizahawm lo a, a bik takin rorel lai member-te aṭangin a ni leh zual," an ti a; ram leh hnam tana ngaihtuahna tak tak séng turin MLA-te an ngen a ni.