Mizoram sorkar leibá a pung zel

Finance enkawltu chief minister Zo-ramthanga tarlan danin, Mizoram leibá a pung chho zel a, Gross State Domestics Product (GSDP) aṭanga chhûta leibat zat pawh a sang tial tial.

Assembly budget session neih mekah ZPM member C Lalsawivunga zawhna chief minister Zoramthanga'n a chhàn­naah Mizoram leiba a pung telh telh tih a lang.

Zoramthanga kaih­hruai sorkar a din tirh, kum 2018-19 a leibá chu cheng vbc. 7,315.55 a nih laiin, kum 2021-22 a leibá chu cheng vbc. 10,570.03 a ni a, kum kal mek 2022-23 (revised projected)-ah vbc. 12,479.25 a ni.

Sorkar kum thar 2023-24 tawpa Mizo­ram leibat zat tura chhût chu vbc. 13,584.80 a ni bawk.

Mizoram GSDP aṭanga Mizoram sorkar leibat zat percentage pawh a sang tial tial a; kum 2018-19 khan 32.89% a nih laiin, kum kal mek 2022-23 (revised estimate)-ah chuan 41.29%-ah a kai chho a ni.