Union Minister-in sorkar official-te a kâwm Khaw 724-ah mobile service a thleng tawh

Union Communications minister of state Devusinh Chauhan chuan February 18, Inrinni khan CS conference hall-ah Information & Communication Technology (ICT) department hotute leh Department of Posts-a Telecommunications department leh BSNL hotute a ṭhukhawmpui. Mizorama khaw awm 877 zinga 724-ah mobile service a thleng tawh tih tarlan a ni.

Sorkar thuchhuah tarlan danin, Department of Telecommunications leh BSNL hotute a ṭhutkhawmpuinaah Union Minister chuan, mipui rawngbawlnaah tunlai thiamna thar hman zel a pawimawh thu a sawi a, information technology lamah ṭan la lehzual turin a chah.

Devusinh Chauhan chuan, Post Office hnuaia India Posts Payment Bank-in mipui hnen a thlen thui zawk theih nan ṭan lâk a ngai nia a hmuh thu a sawi bawk.

Ṭhutkhawma tarlan danin, Mizorama khua awm zawng zawng 877 zinga khaw 724-ah mobile service leh a kaihhnawihte a thleng tawh. BSNL-in 4G saturation project kaltlangin khua leh hmun 181 (24 army outpost-te tiamin)-ah 4G service pek theihna an ruahman mek a, chu'ng zinga khua leh hmun 63 chu mobile service la thlen ngai lohna hmun a ni.

Mizoramah Head Post Office pakhat, sub-postal division pali leh post office leh branch post office 387 a awm mek a; hmarchhak state zingah Mizorama Post office-te chu Assam dawta sum an thawk chhuak ṭha ber a ni.

Central Assistance to States for Capital Expenditure hnuaiah ICT department kaltlangin Mizorama district khawpuite leh RD block ṭhuthmun khuate internet connectivity ṭha zawk thlunzawmna tur project cheng vbc. 50 hû buaipui mek a ni.

ICT department hotute nen an ṭhutkhawmnaah Devusinh Chauhan chuan, Mizoram harsatnate hre chunga hmalak dan tur ruahmanna sorkar laipuia an thehluh leh hunah uluk lehzual turin a chah a, sorkar laipuiah theihtawp a lo chhuahpui zel tur thu a sawi.

Devusinh Chauhan chuan, sorkar laipui scheme Mizorama kalpui mek tam takah internet a ṭhat hmasak loh chuan hnathawh ṭhat a har thu a sawi a, "Thingtlang khaw eng maw zat chu e-connectivity-in a la thlen loh avangin scheme-in a thlenna tur dik tak a thleng thei lo a, mipuite'n an chhawr thei lo ṭhin. Thingtlang khaw tam zawkah bank leh insurance lam a awm mang lo a, hengte hi e-connectivity chak loh vang a ni," a ti.

ICT minister Robert Romawia Royte pawhin thu sawiin, Mizoram chu tlang ram a nih avanga harsatna hrang hrang awmte a sawi a, "E-connectivity tihmasawn turin service provider hrang hrangte inkarah thawhhona ṭha zawk neih a ngai a, theihtawp chhuah a ngai," tiin, harsatna karah central scheme-te mipuiin an chhawr phâk turin Mizoram sorkarin a kalpui zel niin a sawi.

Ṭhutkhawmah hian chief secretary Dr Renu Sharma, ICT secretary SM Ali leh ICT hotu dangte leh sorkar laipui aiawhte an tel a ni.