Bomb-in ATM booth tihchhiat a ni

February 18, Inrinni zing dar 2:50 khan Republic Veng Kawipui bula State Bank of India (SBI) automated teller machine (ATM) booth chu bomb hmanga tihchhiat a ni a, police-in pawi khawihtute chhui mekin, Police thuchhuah tarlan danin, ATM booth-a puak hi gelatine ni ngeia hriat a ni a, thil thlen thu hi Aizawl Police Station chuan zing dar 3 velah dawngin, hma an la nghal a ni. Forensic Science Laboratory-a mithiamte'n an endik bawk.

Bomb hian TIS/signboard, ATM khawl, e-surveillance equipment, UPS/battery leh electrical wiring tihchhia a, pawisa dahna erawh a chhe lo. Pawi phawihtute hian ATM booth chhunga CCTV camera chu inhliah nan spray paint dumin an kâp a, CCTV aṭangin pawi khawihtute hmuh theih a ni lo.

Thil thleng chungchangah hian Aizawl PS-ah Explosive Substances Act, The Prevention of Damage to Property Act leh IPC tlawhchhanin thubuai ziah luh a ni. Chhui turin Mizoram Police chuan Special Investigation Team a din a, Aizawl additional SP PC Lalṭanpuia'n kaihruaiin, member 11 an awm.

Hnu chhuina atana pawimawh leh pawi khawihtute man an nih theihna tura information pe theite chu Mizoram Police chuan lawmmanah Rs 20,000 thleng pek an tiam a; information pe theite tan Aizawl PS phone number 8794747291-ah biakpawh theih reng a nih thu leh information petu hming thup tlat a nih dawn thu an tarlang.