St. Paul's HSS zirlai pangate'n Wipro Earthian National Award dawng

St. Paul's Higher Secondary School-a zirlai pangate chuan project an siam hmangin February 11-12, 2023 khan Bangalore-ah Wipro Earthian National Award an dawng. February 18 khan award dawn lawmna hun an hmang a, School Education director Dr H Lalthlangliana'n a hmanpui.

Information technology lama company lian Wipro chuan science zirna chawikân nan science lam zirbingnaa intihsiakna an buatsaih ṭhin a, kum 2017 aṭangin Science Teachers Association Mizoram (STAM) chu Mizoramah nodal agency a ni.

Intihsiakah hian St. Paul's HSS aṭangin pawl 9 zirlai pahnih Lalrosangi leh Rinchhani Pachuau, pawl 11 zirlai pathum Lalrinawmi, David Zodinmawia leh Sahayog Sarki te an tel a; biodiversity, water and sustainability leh waste management-ahte project an siam a ni.

State hrang hrang aṭangin project ṭha 20 an tel a, tun ṭum hi Mizoram aṭanga an tel vawi khatna a ni a; St. Paul's HSS zirlaite project chu project lut zinga ṭhaah thlan niin, Wipro Earthian National Award dawng tura thlan an ni.

STAM chuan, ram pum huapa project ṭha thlannaah Mizoram an tel chu lawmawm a tih tak zet thu an tarlang a, zirlaite chu theihtawp chhuaha ṭan lo la zel turin a chah bawk.