Mimal leh party tan Airport pawngsual a ni: PC

Peoples' Conference party chuan thuchhuah siamin, Lengpui Airport buaina chu mimal sum siamna atana hman a nih vangah ngaiin buaina chinfel vat an phût.

PC chuan, "Mimal sum siam nan leh party hamṭhatna tur ni àwm taka Airport-in pawngsual a tâwk ta chiam mai hi pawi kan tiin mualphothlak kan ti tak zet a ni," an ti.

PC party chuan, Lengpui Airport chu Brig. T Sailo chief minister a nih laia sual chhuah, Congress leh PC sorkar inṭâwm laia tihpuitlinna tura ruahmanna siam fel, chumi hnua Congress sorkarin a tihpuitlin tâk niin an sawi a, "Lengpui Airport inrêlbàwlna chungchanga tun hnaia Congress leh MNF party-te'n Assembly House thlenga inbeih phah nan nasa taka an hmang hi mipuite'n thu dik tak an hriat theih nan a rang thei ang bera chhui chiang turin thuneitute kan ngen a ni," an ti.