Mizoram State Day vawi 37-na lawm a ni; 'Kan remna hi chil pût zawih zawihin min en Remna export chu kan mawh a ni' - Chief Minister

Nimin February 20 kha Mizoramin state a hmuh ni, State Day a ni a, Mizoram hmun hrang hrangah lawm a ni. State Day vawi 37-na hi Aizawlah chuan Vanapa Hall-ah hman a ni a, khuallian chief minister Zoramthanga chuan, Mizoramin remna a neih chu chhak leh thlang, chhim leh hmara mite'n chil pût zawih zawihin an en thu sawiin, remna thawn chhuah chu Mizoram mawh a nih thu a sawi.

CM Zoramthanga chuan, Mizoram chu mi dangte tan malsawmna ni tura inbuatsaih a ṭul thu sawiin, "Chanchinṭha rawn tírtu khan Mizo nationa­lism, hnam thinlung hi thisena baptist-a a awmna turin kum 20 kan ram kha buaiin a awm a, tunah chuan kha hnam thinlung khán Mizo ṭhalaite tihnghehin an awm. Malsawmna thuthlunga he ram min pek hi mi dangte tan malsawmna nia êng chhuak turin he ram dintu hian a tìr aṭangin a tum a ni," a ti.

Mizoramin tuna êng a neih pakhat chu remna a nih thu sawiin Zoramthanga chuan, "Kan inthlang a, tu mah intibuai loin kohhran inthlang ang mai kan ni. He kan remna hi chhak leh thlang, chhim leh hmar mite'n chil pût zawih zawihin min en a, chu remna export chu kan mawh a ni," a ti a; Mizoramin remna leh muanna a neih chu malsawmna ropui tak a nih thu a sawi.

Chief Minister chuan, Pathianin Mizote tana Mizoram a buatsaih chu ram danga innghat turin a dah lo tih sawiin, "Ram square km. 21,000, ruahtui ṭha, lui kan hman sên loh, thlai engkim chìn chi ṭha em em, min châwm tur atan buh hmun siamna tur hectare 70,000 - 80,000 inkar leileta siam theih, leiletah siam vek ila Zoram mipui min châwm zo leh kan ei sên loh thar theihna min pe a. A hnuaiah ni se, oil leh gas a tam a ni tih min hrilh a, chu chu tunah kan en mup mup mai. Kan boruak ni se duhthusamin a ṭha," a ti.

Mithiamte sawi danin, Mizoramah mau leh rua metric ton nuai 250 vel a awm thu leh chungte chu 'Hmun lia ṭhena hmun khat chauh pawh utilise (hmang) ula, in ram economy chu khítah a awm ang,' an tih thu te, chumi hmang ṭangkai tur chuan sorkar laipui puihna a ngaih thute CM chuan a sawi.

CM Zoramthanga chuan, hmasawnna chu thâwklehkhata thleng vek thei ni lo mah se, a rahbi thiam taka zawna kalpui a ṭul thu sawiin, "He ram malsawmna hi la chhuak a, hmun danga ên chhuahtir a, mi dangte tan malsawmna ni ve turin mi dang kutah ni loin kan kutah a awm. Zoram mipuite Lalpa'n malsawmna min pek hi kan hmabakah challenge-in a awm a ni tih vision nei turin ka duh a ni," a ti a; Mizoramin malsawmna hrang hrang a neihte chu activate (tiche/ nung) turin Mizo mipui a sawm a ni.

NGO Coordination Commi­ttee chairman R Lalngheta, CYMA president pawhin thu sawiin, sorkar hruaitute leh sorkar hnathawktute chu Mizoram dah pawimawh hmasa ber a, hlemhlêtna tel loa hna thawk turin a sáwm.

State Day lawmna inkhawm hi chief secretary Dr Renu Sharma-i'n a kaihruai a; deputy chief minister Tawnluia, Assembly speaker Lalrinliana Sailo, minister, MLA leh sorkar hotu dangte an tel. District dangahte pawh State Day hi lawm a ni.