MKHC-in inthlan thuchah an tichhuak
Mizoram Kohhran Hruaitute Committee (MKHC) chuan nimin khan kumin 2023 tàwp lama MLA inthlanpui awm tur pualin inthlan thuchah an tichhuak a, ngai pawimawha zawm turin political party-te leh mipui an ngen.
MKHC chuan, candidate atan Pathian ṭih mi, mi hmingṭha leh rinawm, ruih theih thila fihlîm, hlêpna bawlhhlawh leh thamna duh lo, mipat hmeichhiatna lama hminghliauna nei lo dah tur leh, hel pawl, invau leh ralthuam lam chite hmang lo turin political party tin an ngen a; vote leina anga ngaih theih sum leh thil dang sem lo tur te, tharum thawhna chawk tho thei chi ṭawngkam uchuak hmang lo tur leh inelsèn zawnga mi sawichhe lo tur te, a taka tih theih loh turah intiam lo turtein party leh candidate-te an ngen bawk.
Sorkar ṭha leh nghet a din theih nan thuchah an siam tih tarlangin MKHC chuan, "Kohhran mipui leh political party zawng zawngte'n ngai pawimawha zâwm turin kan ngen a che u," an ti.
MKHC chuan, ram hruaitu tur mi ṭha thlan chhuah a nih theih nan leh muanawm taka inthlan a nih theih nan Pathian hnenah ṭawngṭaia ṭan la ṭheuh turin mi tin an ngen bawk.
