Utilisation certificate thehluh tlai avangin Horticulture dept.-in vbc. 12.86 an chán

Assembly session-a pharh tâk, 'Report of the Comptroller and Auditor General of India on Social, Economic and Revenue Sectors for the year ended March 31, 2020'-a tarlan danin, Horticulture department chuan utili­sation certificate (UC) an thehluh tlai avangin cheng vbc. 12.86 an chán.

CAG tarlan danin, Mission for Integrated Development of Horti­culture (MIDH) hnuaiah sorkar laipui chuan Horticulture department chu kum 2018-19 khan cheng vbc. 33.33 leh kum 2019-20 khan cheng vbc. 32.40 a pawmsak a; mahse, Horticulture department hian kum 2018-19 ah cheng vbc. 27.78 leh kum 2019-20 ah cheng vbc. 25.09 an dawng.

Horticulture depart­ment-in sorkar laipuiin a pawm tawh aṭanga a dawn loh chu kum 2018-19 ah cheng vbc. 5.55 leh kum 2019-20 ah cheng vbc. 7.31 a ni a; sum an dawn kim loh chhan chu utilisation certificate thehluh tlai vang leh programme tihhlawhtlin muan vang a ni.

CAG hnenah hian Horticulture department chuan, MIDH hnuaia sumte chu instalment-a pek chhuah a nih thu an hrilh a, "Instalment tawp ber chu financial year tàwp dawn lamah release a ni. State sorkarin a sanction hnuah civil deposit-ah dah a ni a, department-in kan dawng lo. Hei hian utilisation certificate siam kawngah harsatna min thlen a ni," an ti.

CAG report-a tarlan danin, MIDH hnuaia sorkar laipuiin a tum tur (90%) chu Mizoram sorkarin department hnenah a pe chhuak har a, ni 5 aṭanga ni 203 chhungin a pe a ni. Mizo­ram sorkarin a tum ve tur pawh department hnenah ni 68 aṭanga ni 364 chhungin an pe chhuak chauh bawk.