2022-ah Khawzawl dist-ah tomato qtl 18,420 thar; Tualte-in qtl 15,200 tharin cheng nuai 654 an la lut

Kum 2022 chhung khan Khaw-zawl district-ah tomato quintal 18,420 an thar a, chu'ng aṭang chuan Rs 7,12,50,000 an la luta ngaih a ni a; thar tam ber Tualte khuain qtl 15,200 tharin, Rs 6,54,00,000 an la lut.

Horticulture department-a Khawzawl Division-in an chhin­chhiah danin, kum 2022 khan Tualte khuaah hian mi 223-in tomato an chíng a, chu'ng mite chuan kum 2022 khan tomato qtl 15,200 an thar. Tomato an chìnte chu IIHR, Bangalore-a siam chhuah Arka Samrat leh Arka Abhed variety-te a ni.

Tualte Tomato Growers Society (TTGS) hruaitute sawi danin, an khuaah hian off-season tomato an tih mai an chíng a, chu chu ṭhál lai February-March leh fûr lai June-July vela chìn chite a ni. Ṭhál laia a chi an kûite chu July leh August thlaah an seng a, fûr laia an kûite chu December-January velah an seng ṭhin.

TTGS chairman Lalchhan­chhuaha chuan, tomato chìn bul an ṭan tirh chuan member chhungkua 20 vel an ni a, an pun zel thu sawiin, kum 2021-ah 135 leh kum 2022-ah member 223 an nih tawh thu a sawi a, "A tirah chuan tomato 500 chíng chin member atan kan la a, tunah chuan 1,000 chíng chin member-ah kan la tawh," a ti a; Society member-te an inlungrual a, Society kaltlang loa tomato hralh an awm ngai loh thu a sawi.

Vanglaini palai zawhna chhangin Lalchhanchhuaha chuan, nikum June thla vel khan tomato eng emaw zat an paih thu sawiin, "A hnuah chuan Silchar leh Tahan-ahte pawh kan hralh a, hralh loh ai chuan tlâwm zawk deuh pawha hralh kan duh," a ti.

Lalchhanchhuaha chuan, Primary Agricultural Credit Society (PACS) an din tawh a, PACS hmang chuan loan an pek chhuah theih ṭêp tawh thu a sawi.

Zawhna chhángin, Tualte-ah chhungkua 250 vel an awm thu leh chhungkaw 60-in SEDP ṭanpuina an dawng tawh a, tomato chìn thlang vek an nih thu a sawi bawk.

TTGS hruaitute chuan, nikum khan enchhinna atan tomato ketchup an siam thu sawiin, kumin 2023 aṭangin hralh tura siam tak tak an tum thu an sawi a; tomato ketchup an siam chu phai lama siam aiin a man a to bik dawn loh thu an sawi a ni.

Khawzawl district-a khaw dang pali-ah pawh off-season tomato an chíng a, chu'ngte nen chuan kum 2022 chhung khan Khawzawl district-ah tomato quintal 18,420 an thar a, chu'ng aṭang chuan Rs 7,12,50,000 an la luta ngaih a ni.

Kum 2022 chhung khan Khawzawl district-a Tualte dawta tomato chíng nasa ber Chawngtlaiah chhungkua 85-in qtl 1,400 tharin Rs 53,00,000 an la lut a, Khawhaiah chhungkua 80-in qtl 900 tharin, Rs 34,50,000 an la lut. Rabungah chhungkua 30-in qtl 680 tharin, Rs 26,00,000 an la lut a, Khawzawlah chhungkua 10-in qtl 240 tharin, Rs 9,00,000 an la lut bawk.