KHAWTHLIR

Chhui zui zel
February 18, Inrinni zing dar 2:50-a Republic Veng Kawipui bula State Bank of India automated teller machine (ATM) booth bomb hmanga beitute chu police-in an la chhui zui zel a, rinhlelh man an la nei lo. Tarlan tawh angin, thil thleng chhui tur hian Mizoram police chuan Special Investigation Team a din a, Aizawl additional SP PC Lalṭanpuia'n kaihruaiin, member 11 an awm a ni.

Venbuk Thlam sa
YMA, Maubawk Branch chuan, Tlawng luia a ruka balu la ṭhinte leh Maubawk rama thing leh mau la ṭhinte venna turin nimin khan Tlawng lui Reiek kai chhakah vènbûk an sa. Maubawk YMA chuan, kum 2015 aṭangin Maubawk ram chhung, nungchate leh Tlawng lui an humhalh ṭan tawh a, tlaivara duty ṭumte pawh an nei tawh ṭhin a ni.

MLA-in hawng
Serlui bialtu MLA Lalrinsanga Ralte chuan nimin khan a bial chhung Bilkhawthlir North VC-in futsal ground an siam a hawng. Bilkhawthlir North VC hian 15th Finance Commission aṭanga Rs Rs 9,00,520 an hmuh hmangin futsal ground an siam a, MLA fund aṭangin phûl lem phah tur a tumsak a ni.

Kuhva thar zat
Land Resources, Soil & Water Conservation minister R Lalzirliana chuan Assembly session-ah ZPM member VL Zaithanzama zawhna ziaka chhangin, Mizo-ramah kum khatah kuhva qtl 1,87,703.29 vel thar chhuah ṭhin a nih thu a tarlang.

Duty titawp
Kuhva Chingtu Co-operative Society, Bil-khawthlir-in Myanmar aṭanga dan loa kuhva tawlhin an khua a paltlang lohna tura December 14, 2022 aṭanga chhun zan zawma an duty ṭhin chu February 18, Inrinni tlai aṭang khan an titawp rih. Duty an tihtawp chhan chu, dan loa Myanmar kuhva ro phurh ṭhin man tuma an duty avanga an kuhva tharte man zawka hralh a nih tâk avang te, Assam lama an kuhva khârtute'n harsatna an tawh tâk loh avang leh, chhun zan zawma duty chu ṭhenkhat tan phurrit a nih tel vangte a ni.