District hrang hrangah State Day lawm a ni

Nimin February 20 kha Mizoramin state a hmuh ní, State Day a ni a, Mizorama district khawpui hrang hrangah lawm niin, minister/MLA-te leh bawrhsapte'n an hmanpui a, sorkar hnathawkte an tel.

Lunglei

State Day hi Lungleiah chuan Convention Centre-ah lawm a ni a, Lunglei South bialtu MLA Dr K Pachhunga khuallian a ni.

Dr K Pachhunga chuan, remna leh muanna vawng nung zel turin kal khawmte a chah a, "Kan state-in hma a sawn zelna turin a chhunga chêng mi tin kan pawimawh a, sorkar mawhah chauh ngai loin, kan hmazâwn ṭheuhah mi tinte'n ṭan kan lak a ṭul," a ti a; ṭhahnemngai taka ram leh hnam hmasawnna tura theihtawp chhuah zel turin sorkar hnathawkte a chah.

Siaha

Siaha bawrhsap Lalhmun-sanga Hnamte hoin DRDO conference hall-ah State Day vawi lawm a ni a; inpumkhatna tichhe thei thil kalsan turin district mipui a chah.

Lalhmunsanga chuan, Siaha district chu chhim tàwpah awm mah se, tumruhna leh taimakna nena ṭan an lak chuan kawng tam takah district dangte entawn tlak khawpin thil a tih theih thu a sawi a, "Mahni hna ngai pawimawh hmasa lo a, thil dang ngaih pawimawh hmasak hian nasa takin min pawt hniam thei. Sorkar hna hi Pathian hna a ni tih i hre reng ang u," a ti.

Champhai

State Day hi Champhaiah chuan IPR auditorium-ah lawm a ni a, bawrhsap James Lalrinchhana khuallian a ni.

James Lalrinchhana chuan, State Day lawmna chuan state puitling ni tura a ṭobulte mipuiah hriat thartir se a duh thu a sawi a, "State dinhmun nihna hlu tak vawng nunga humhim zel turin rilru puitling tak nei chungin thiamna leh finna kawngah rual elna dik kan neih a pawimawh," a ti.

Kolasib

Kolasib IPR conference hall-ah pawh State Day lawm a ni a, khuallian John LT Sanga, bawrhsap chuan, Mizoram chu India rama state dangte ang bawka Constitution hnuaia chanvo nei a nih thu sawiin, "Heng chanvo nei tura ram pasalṭha inpekna te, an huaisenna leh an tawrhnate hi ṭhangtharte'n an hriat thar a, zahna lantir nachang an hriat a ṭul," tiin a sawi.

Serchhip

Serchhip DC Nazuk Kumar hoin DC conference hall-ah State Day lawm a ni a; Nazuk Kumar chuan, "Mizoramin state a nih theihna tura sûlsutu hruaitu hmasate hre rengin kawng tinrêngah mi tin thleng phak hmasawnna a awm zel theih nan thukhat vuain i thawkho zel ang u," a ti a, Mizoram mawina, hnam ziaráng, rimawi leh pipu thil hluite vawng nung zel turin kal khawmte a sáwm.

Lawngtlai

State Day hi Lawngtlaiah chuan DC conference hall-ah lawm a ni a, DC David Lalthantluanga hoin khuallian a ni. Bawrhsap chuan, state nihna chu harsatna tam tak paltlanga hmuh a nih avangin ngaihlu tur leh state dangte tana state entawn tlaka Mizoram din a nih theih nan theihtawp chhuah turin district mipui a chah.

Mamit

Mamitah pawh DC conference hall-ah lawm a ni a; khuallian Lalnunhlua, bawrhsap chuan, "Kum 36 chhung state puitlinga hlankai kan nih hnuah pawh kan district chu India rama district hnufual kan la ni hi kan politician-te chauh mawhphurtu an ni lo a, kan zavaia neitu rilru pua ṭan kan lâk a ngai," a ti a, rilru leh ngaihtuahna thar nei a, mahni hmazawna tih tur awmte phûr taka ti zel turin mipui a sáwm.

Khawzawl

State Day hi Khawzawlah pawh bawrhsap CC Lalchhuangkima hoin DC conference hall-ah lawm a ni a; Bawrhsap chuan, "Mi hmasate inpekna leh thawhrimna avanga state puitlinga Mizoram hlankai a ni leh, mahnia ro inrêl theia a awm hi a ropui," a ti.

Hnahthial

Hnahthialah chuan Zofa Rûnah State Day lawm a ni a, minister Dr R Lalthangliana, bialtu MLA-in a hmanpui a, State Day pian chhan chu MNF movement kal zel a nih avangin MNF tan ni chhinchhiah tlak leh ni ropui a nih bik thu a sawi.

Minister chuan, Mizoram chu kum 20 chhung rambuai a nih hnu leh June 30, 1986-ah inremna ziah a nih hnuah February 20, 1987-ah state puitlingah hlankai a nih thu a sawi a, "State Day lo pian chhan hi MNF movement kal zel, remna leh muanna kan neih aṭanga nei thei chauh kan ni a, kan sorkar tan leh MNF tan chuan ni chhinchhiah tlak, ni ropui leh danglam tak a ni. Sorkar pisa chawlh satliah ringawt ni lo, district tinah bawrhsap hoa hman ni se tih kan rêl a, Mizoram tan a hlu bik riau a ni," a ti.