MUP-in inkhawmpui an hmang

Mizoram Upa Pawl (MUP) Aizawl South-II leh Aizawl West-III te chuan nimin khan area conference an hmang a, minister leh MLA-te'n an hmanpui.

MUP Aizawl West-III chuan Bungkawn Vengthar YMA Hall-ah Area Conference vawi 12-na, an hmang a, Social Welfare minister Lalrinawma'n a hmanpui. February 2020 leh January 2023 inkara an member thi mi 199, mipa 104 leh hmeichhia 95-te sûnna hun hman a ni.

Social Welfare Minister chuan, kum upate zahna chibai a bûk tih sawiin, an thiamna leh hriatnate ṭhangtharte tan hlân chhâwnga finchhuah zel turin a ngen a, "Kum upate thluak nêm hi sorkar leh ram pawhin a ṭhatpui ṭhin. Kum 60 mi chuan chhungkua, khawtlang, ram leh hnam tan theihtawpin ke an lo pen tawh ṭhin a ni," a ti.

MUP chu 'Midangte tana malsawmna nih' thupui neitu an nih angin hemi hlen chhuahna kawngah theihtawp chhuah zel tura sawmin Lalrinawma chuan, "Kan ṭhalaite leh kum naupang zawk ruihlo bawih a tangte chhanchhuahna kawngah hian upate'n kan tu leh fate hnenah ruihhlo that loh zia hrilh tam a ṭul," a ti a, mahni hnam zia rang ngaih pawimawhna kawngah ṭan lak a pawimawh thu a sawi a ni.

MUP, Aizawl South-II chuan nimin khan Model Veng Presbyterian Kohhran Hall-ah area conference an hmang a, bialtu MLA Lalchhuanthanga'n a hmanpui. Conference hi hun thum - inthlan, rorel leh kum upa chawimawina hunahte ṭhen a ni a; khuallianin kum upate hnenah chawimawina thilpek a hlan a ni.

Lalchhuanthanga chuan, "Kum upate hi kan hnam rohlu inni a, kan ram leh hnam kaihhruaina atan intawnhriat hi a pawimawh em em reng a ni. Kan ramah kum upate inkawm hona emaw a bika inenkawlna emaw kan la siam ve thei lo. Kan society mila kan thiam dan hi a la tawkah kan ngai rih pawh a ni mai thei e. Hun a lo kal zel ang a, kum upate tan a bika inenkawlna hi kan la neih a la ṭul ngei ang," a ti.