Saitual district VC inkhawmpui hmanpui

Saitual District Village Council Association chuan nimin khan Rulchawm khuaa Kaphranga Hall-ah Assembly vawi khatna an hmang a, Human Resource Development Board vice chairman Dr L Thangmawia, Lengteng bialtu MLA-in a hmanpui.

Dr L Thangmawia chuan, sorkar hmalakna zawng zawng deuh thawah VC-te chu sorkar kutkê an nih thu sawiin, "In tel loa sorkarin hna a thawh theih loh tam tak a awm a, rinawm leh dik taka in mawhphurhna mipui tana hlen chhuak zel turin ka ngen che u a ni," a ti. Saitual district-ah hian VC 44 awmin, VC member 212 an awm mek a ni.

MNF sorkarin Saitual district a puan chu kum 10 hlam chhiah a nih hnuah MNF sorkar vêkin a tipuitling tih sawiin L Thangmawia chuan, "Tunah chuan DC dah vek a ni tawh a, a tahtawlin district office hrang hrang dah zel a ni. Saitual district bikah department pariat chu district office-ah upgrade ni tawhin, department thar panga hawn a ni tawh," a ti a; district thar pathumah department 13 pisate chu district office-ah hlan kai a nih tawh thu leh department 27 hawn thar a nih tawh thu a sawi.