Aizawlah Zomi Namni hman a ni

Zomi Cultural Society (ZCS) Aizawl Joint Committee huaihawtin nimin khan Bawngkawn Chhimveng Cultural Hall-ah Zomi Namni vawi 75-na hman a ni a, minister of state TJ Lalnuntluanga'n khuallian niin a hmanpui.

Zomi Namni hmannaah hian mi ṭhahnem tak telin, hnam lâm leh zaite entir a ni a, Myanmar member of parliament (MP) Thang Tuan Pau chu khualzahawm a ni.

TJ Lalnuntluanga chuan, Zomi Namni hman dan chu ropui a tih thu sawiin, "Hnam inpumkhatna hi a hlu a, inngeih taka awm leh ṭan rual chuan hnam chak takah min chhuah thei. Mizoram sorkar kan hrawn mek hian hnam inpumkhatna a ngai pawimawh em em a, sorkar a din aṭang khan kan chhehvela kan unaute nena inpawhna ṭha zawk kan neih theihna turin hma a la nghal a ni," a ti.

Minister chuan, Zo hnahthlakte nena inkalpawhna atan Aizawl leh Jampui (Tripura) inkarah MST bus (hnam inpumkhatna bus) tlântir a nih thu sawiin, "Aizawl leh Lamka (Manipur) bus service pawh hun rei lo têah tihfel beisei a ni," a ti a; Aizawl-Tahan bus service tura hmalakna erawh chu Myanmar ram a buai avangin a ṭhuanawp rih thu a sawi.

TJ Lalnuntluanga chuan, Champhaiah Zomi Cultural Centre sak a nih theihna turin North Eastern Council kaltlangin project siam a nih thu sawiin, "Fund hi hmuh mai theih tur niin, Zomi Cultural Centre hi Champhaiah sak thuai tum a ni a, Chief Minister-in priority list-ah min dahsak a, a lawmawm hle a ni," a ti.