Budget sawihona zawh a ni; Leibâ ka engto vak lo - CM

Nimina Assembly budget session-ah sorkar kum thar 2023-24 atana Mizoram budget sawihona zawh a ni. Chief minister Zoramthanga chuan, leibá an engto vak lutuk loh thu a sawi.

Chief Minister chuan, leiba dinhmun enin state lian chuan an ba tam tih sawiin, "India ram state zingah Sikkim-in cheng vbc. 12,982 báin an ba tlem ber. Leiba tlém ber dawttu kan ni a, cheng vbc. 12,991 kan bá. Sikkim nen kan inzah thuak. State dangte pawh en ila, keini aiin an ba tam vek," a ti.

Leiba ngah lutuk vanga beidawng an awm dawn a nih chuan, Mizoram aia beidawng tur an tam dawn tih sawiin Zoramthanga chuan, "Leibá hi hmân aṭangin kum tin a kal chho reng a, state zawng zawng kal dan a ni. Chuti lutukin kan eng to lo," a ti a; state dangte chu Mizoram bat lêt eng emaw zata tam ba te an nih thu a sawi.

Finance Minister chuan, sum harsat chhanah Covid-19 chhuanlam a tling lo anga sawi chu thu dik lo a nih thu sawiin, "Mi ram central finance minister-te pawhin mahni nunna lâk duhna khawpa an manganpui a ni a, engmah a ni lo tih theih a ni lo re re. Sawi nêp eng ang mah ila khawvelin a awih lo hrim hrim," a ti.

Covid-19 avangin central-in budget-a dah tura a tih, hmuh leh si loh Mizoramin cheng vbc. 3,000 chuang a nei nia sawiin CM Zorama chuan, "Hei bakah hian state-in kan thawh chhuah ve tur pawh a tlahniam nasa a ni," a ti a; ramri buai, vawk hri léng leh lirnghingte pawh Mizoram economy-in a tawrh thu a sawi.

SEDP chungchang sawiin Zoramthanga chuan, "Normal pang-ngaiin sorkar ila chuan a tìr aṭanga ṭan kan duh, Covid-19 avangin kan sem thei lo, dam khaw chhuah kan vaia kan tum tlân a ni," a ti.

Chief Minister chuan, Covid-19 avangin SEDP hnuaiah ṭanpuina sem thei turah pawh an inngaih tawh loh thu sawiin, "Tun hnuah boruak a ziaawm ta a, kan duhthusam chuan sem thei lo mah ila, a bul ṭanna atan ti teh ang kan ti a ni. Cheng nuai 3 pek nghal tihngaihna a awm ngang lo," a ti a; SEDP chu sem chhunzawm zel a nih dawn thu a sawi.

Lalduhoma

ZPM Legislature Party leader Lalduhoma chuan, Mizoram chu India ramah leiba ngah ber state a nih thu sawiin, "Leiba hi GSDP behchhana sawi tur a ni a, mipuite i bum tawh lo ang u, thu dik tak i hrilh ang u," a ti.

Lalduhoma sawi danin, RBI-in statement a tihchhuahah chuan GSDP aṭanga chhûtin Mizoram leiba chu kum 2021-ah 42% a ni a, India rama leiba tam ber dawttu a ni. Kum 2022-ah chuan 56% niin, India rama leiba tam ber a ni a, kum 2022-23 ah pawh 55% niin, leiba tam ber a ni leh bawk.

Leiba tlem ber pahnihna anga an inchhál ngam chu mak a tih thu sawiin Lalduhoma chuan, "He laiah hian ziakin sawi ṭhin mah ila, RBI hi kan bum ngai lo ang," a ti.

ZLP Leader chuan, Covid-19 avangin Mizoramin hmuh tura a beisei sa loh cheng vaibelchhe tam tak a hmu tih sawiin, "Covid-19 avangin kan che thei lo tih chu a taka thil lo thleng nen inhmeh lo tak a ni," a ti a; nunna chánte an awm avanga a pawi hle rualin, ṭhatpuina tham malsawmna Mizoramin a dawn phah thu a sawi.

Zodintluanga

Congress Legislature Party leader Zodintluanga Ralte chuan, Mizoram budget tharah ram hmasawnna tur vision pakhat mah a awm lo niin a sawi a, "Kan budget hi awmze nei lo, mipui tana hlâwkna tur awm lo a ni. Kan minister-te'n hna thawhna tur pawisa an department-ah an nei lo," a ti.

Zodintluanga chuan, state matching share atan sum dah ṭeuh ringawt a nih thu sawiin, "A thei fain an dil chhuak ṭhin. Chumi chu kan ti dawn tih a awm lo, central scheme-ah kan innghat ringawt a ni," a ti a, ram kalphung tur chu rèl ve tur nia a hriat thu a sawi.

Covid-19 avanga harsatna sawi ṭhin ni mah se, an duhnaah chuan sum a harsa lo tih sawiin CLP Leader chuan, "Lengpui Airport-ah sum tam tak dah a ni a, CM-in a tlawh zing lutuk an ti. Tender pawh an chhuah hmain hna thla 5 chhung an thawk hman a, an thawh tawh hnuah restricted-in an ti. Chu mai a ni lo, an sa chim a, contractor laka action lak a awm pawh kan hre lo," a ti.