KHAWTHLIR

Tender loin  hna 919 pe
UDPA changtu deputy chief minister Tawnluia chuan INC member Zodintluanga Ralte zawhna ziaka chhángin, UDPA department hnuaiah kum 2019 aṭangin sorkarin tender chhuah loin hna 919 a pe tawh. Hei bakah hian restricted tender hmangin hna 13 a pek tawh thu a tarlang.

CM hoin G20 tur thlirho
February 20, Thawhṭanni khan Chief Minister’s Office conference hall-ah March 2, 2023-a Aizawla G20 business meeting neih tur sawiho a ni a, chief minister Zoramthanga'n a kaihruai. Thupui thlan sa mila Mizorama sum peipun dan hrang hrang awm theite sawiho a ni a; sorkar deptt. pathum leh mimal sumdawng pahnihte'n an inbuatsaih dan an sawifiah a, her rem ngai leh siamṭhat ngaite siam rem a ni. Hun hman dan tur duante thlirho a ni bawk.

Din champha lawm
Mizoram Upa Pawl, Armed Veng South unit chuan nimin khan an veng community hall-ah an din champha vawi 35-na an lawm a, minister of state Robert Romawia Royte, bialtu MLA-in a hmanpui. Minister hian kum 35 tlin lawmpui nan Rs 50,000 a pe.

Lawmman sem
Lunglei district-a kângmei chhuak tur vên pawimawhna tilang thei thu tâwi inphuahsiak, slogan writing competition lawmman semna inkhawm nimin khan Lunglei DC pisaah hman a ni a, additional DC Donny Lalruatsanga'n lawmmante a sem. Intihsiakah hian Vanlalduhawma s/o Hualsihkhuma, Thénhlûm pakhatna a ni a, a thu phuah chu 'Meiin a tihhlum hma chein mei tihlum la, i vên theih loh mei nun suh' tih a ni.

Power dept E-in-C thar 
MPSC-in sorkara rawtna a thlen angin Lalhmingliani Hmar, MES (Electrical) chu Power & Electricity department engineer-in-chief (E-in-C)-ah kaisantir a ni.