Sports hmunhma siamna atan PMJVK-ah vbc. 422.03 hmu tawh

Sports & Youth Services minister Robert Romawia Royte chuan MNF member H Lalzirliana zawhna chhángin, tun sorkar chhungin PMJVK hnuaiah infiamna hmunhma (sport infrastructure) tihhmasawnna atan sorkar laipui aṭangin sanction approval cheng vbc. 422.03 hmuh a nih tawh thu Assembly House a hrilh.

Sports Minister chuan, Mizoram sorkarin district sports complex pathum siam turin hma a lâk mek thu a sawi a, "Lungleiah cheng nuai 4,919.31, Lawngtlaiah cheng nuai 5,019.43 leh Mamitah cheng nuai 4,496.48 sêngin siam a ni ang," a ti.

Robert Romawia chuan, infiamna lama hmasawnna turin hnawh khah ngai a tam thu sawiin, "Kan sorkar tirhah a manganthlak. Gap facility scheme tam tak a awm a, theihtawp kan chhuah zel ang," a ti a, PMJVK pawh gap facility scheme a nih thu a sawi.

Zawhna kal zelah Sports Minister leh ZPM member Lalduhoma, opposition group leader chu an thu a inhmuh loh avangin an inhnial a; speaker Lalrinliana Sailo chuan, "He House hi a zahawm a, mipui pawh an zahawm. Thu dik leh dik lo sawi kan en ang. Thu inchuh lai tak, tu nge dik lo zawk kan en ang," tiin a chalrem a ni.

Lalduhoma hian Mizo hmeichhe footballer Mizoram tana feh chhuak in­hliam enkawlna senso Mizoram sor­karin a tumsak vek niin Robert Romawia'n a sawi niin a sawi a, Robert Romawia chuan hmeichhe footballer chungchang chu Assembly House-ah a hmain a la sawi loh thuin a ṭang thung a ni.