BAO sawn chhuah duh lohna lantirin N Vanlaiphai mipuiin kawng an zawh

North Vanlaiphai aṭanga East Lungdar khuaa Block Agriculture Office (BAO) sawn duh lohna lantirin North Van-laiphai mipuite chuan nimin khan an khuaah kawng an zawh a, mi 2,000 chuang an tel. BAO sawnna thupek sût turin Mizoram sorkar an phût.

Kawngzawhah hian N Vanlai­phai khaw mipui an tel ṭha hle a, harsatna nei bik tih loh chu chhungkaw tin aiawh an tel bakah, chhungkaw eng emaw zat chu chhungkaw member zawng zawng an thawk chhuak tih an sawi. Mipuite chu an au rual a, khawtlang hruaitute'n thu an sawi bawk.

N Vanlaiphai VC president Lalṭanpuia chuan, BAO chung­changa hmalakna kal zel turah a ṭul a nih chuan VC member-te chu ruling VC an nihna aṭanga bàn an inhuam thu leh, MNF party aṭangin an seal daha bàn vek an inhuam thu a sawi.

Kawngzawh avang hian N Vanlaiphaia sorkar pisa, sikul leh dâwr zawng zawng khâr a ni a, khawlaiah lirthei tlân chhuak hmuh tur a awm meuh lo bawk.

N Vanlaiphai aṭanga thu dawn danin, sorkarin N Vanlaiphaia BAO pisa thar a sak chu kum 2022 tir lam khan Block Agriculture Officer leh thawktu dangte'n an luah lut a, tluang taka hna an thawh laiin Mizoram sorkar chuan January 30, 2023 khan BAO chu East Lungdarah sawnna tur thupek a tichhuak a ni.

Sorkar hmalak danah an lungawi loh avangin N Vanlaiphai Joint Action Committee (JAC) an din a, BAO sawnna thupek February 17, 2023 ral hmaa sût tura ngenna sorkarah an thehlut a ni. Sorkar aṭanga hmalakna leh hriattirna an hmuh loh avangin JAC hmalaknain nimin khan kawngzawh an huaihawt ta a ni. Kawngzawhah hian BAO sawnna thupek copy an hâl bawk.