Aizawlah Chin National Day lawm a ni

February 20, Thawhṭanni zan khan Vanapa Hall-ah Chin National Day vawi 75-na lawm a ni a, khuallian chief minister Zoramthanga chuan, Zo hnahthlakte inpumkhatna leh inunauna chhawm nun zel a pawimawh thu a sawi.

Chin National Day lawmnaah hian Chin mi ṭhahnem tak an tel a, hnam làm leh zaite entir a ni. Central YMA, MZP, MSU, ZORO leh Manipur Kuki Inpui aiawhte pawh telin thu an sawi. Zo hnahthlak Myanmar rama awmte chu Chin tia sawi an ni.

CM Zoramthanga chuan, ram chhung buai vanga Myanmar rama Chin mite'n sahimna zawnga an ram an tlânsan a ngai chu pawi a tih thu a sawi a, "An lo luh tirh kha Covid-19 hripui lèn nasat zual lai nen a innang a, a vanduaithlak. An tan Mizoram chhunga chêngte chuan theihtawp an chhuah a, Myanmar ramah remna leh muanna a awm leh ngei kan beisei," a ti.

Harsatnate chu Pathian remruat vek a nih thu sawiin Zoramthanga chuan, "Tunah chuan hrethiam rih lo mah ila, beiseina nen hma lam hun thlir phawt a ṭul cháng a awm," a ti a; Zo hnahthlakte inpumkhatna leh inunauna chu chhawm nun zel a pawimawh thu a sawi.

Inkhawmah hian Chin state chief minister hlui Salai Lian Luai leh MP hlui Dr Naih Tam Maung te pawhin thu an sawi a; Mizoram sorkar leh mipuiin ráltlânte lo tuamhlâwma an puihna zawng zawngah lawmthu an sawi a ni.