Kolasib-ah ruihhlo thubuai 42 a awmKolasib-ah ruihhlo thubuai 42 a awm

Kolasib DC John LT Sanga hoin nimin khan DC conference hall-ah sâwt zawka ruihhlo do a nih theih nana dan hnuaia hmalak dan inzirtirna, legal awareness buatsaih a ni a; Kolasib-ah ruihhlo kaihhnawih thubuai chinfel tur 42 a awm mek thu leh, ruihhlo vanga court-a inlante chu a neitu tak an nih loh tlangpui thu tarlan a ni.

Fast Track Court judge Julie Lalrinzami chuan, Kolasib-ah ruihhlo leh a kaihhnawih thubuai chinfel tur 42 a awm mek thu sawiin, "Ruihhlo vanga court-a rawn inlante hi ruihhlo neitu tak an ni lo tlangpui. Dan chu khawtlang ṭhatna tura ruihhlo doa tlawmngaia kal chhuak ṭhinte kut phuarna ni loin, sâwt zawka hmalakna kalpui a nih theih nana hmanraw ṭangkaia hman tur a ni," a ti.

Julie Lalrinzami chuan, dan hriat loh avangin thawhrimna leh hmalaknate'n a nih dan tur angin awmzia a nei ṭhin lo tih sawiin, dan hriat lohna chu hremna pumpelh nan chhuanlam a tlin loh thu a sawi bawk.

Kolasib chief judicial magistrate Cacy Malsawmtluangi Ralte pawhin thu sawiin, court hnathawh zinga pawimawh ber chu mihring dikna chanvo humhalh a nih thu leh ruihhlo donaa hmalaknaah mihriing dikna chanvote ngaih pawimawh tel a ṭul thu a sawi.