ILP chungchanga Thangtea thusawi ZPM party ṭhalaite'n an pawm lo

ZPM Ṭhalai chuan thuchhuah siamin, minister Dr R Lalthangliana'n Hnahthiala State Day a hmanpuinaah, ILP chu Mizoram Peace Accord hrin chhuah anga a sawi chu an pawm loh thu leh hriatthiam har an tih thu an tarlang.

ZPM ṭhalaite chuan, minister R Lalthangliana chu MNF ministry-a minister zingah thiamna nei sang leh tawnhriat ngah a nih thu sawiin, "ILP chungchang leh Peace Accord dâwt thu hmanga a sawi zawm hi pawi kan ti hle. Inner Line Regulation leh Inner Line Permit chungchang hi Bengal Eastern Frontier Regulation, 1873 para 2-ah tarlan tawh a ni a, Peace Accord khan a pawlh dal zawkah kan ngai," an ti.

ZPM Ṭhalai chuan, "MNF-te'n inremna neih an châk tawh luatah 'Kan sa lu hawn tur' tia Pu Laldenga'n keipui sa hauh taka a hauh, Mizoram ramri chungchangah pawh Boundary Committee duh dan pawh dinpui ngam loin, ramri atana Mizo mipuite'n kan pawm theih loh North Eastern Areas Reorganisation Act, 1971 chu a rawn pawmpui a. Hei hi India sorkar lakah Pu Laldenga a tlâwm tak zetzia tilangtu a ni," an ti bawk.