Serchhip College hmeichhe hostel hawng

Higher & Technical Education minister Dr R Lalthangliana chuan February 20, Thawhṭanni khan Serchhip College-ah hmeichhe hostel thar a hawng.

Serchhip College Girl's Hostel sak thar hi University Grant Commission sum pek nuai 40 hmangin bul ṭan a ni a, hun eng emaw chen sum dawn chhunzawm a nih loh avangin sak chhunzawm theih a ni lo. Tun hnaiah state sorkar sum aṭangin cheng nuai 17 an dawng leh a, zirlai 24 leh warden awmna tur in sak a ni.

Dr R Lalthangliana chuan, Serchhip College chu Aizawl páwna college zinga NAAC grade A hmu thei hmasa ber a nih thu a sawi a; NAAC-in grade eng ang pawh pe se, zirna ṭha pe a, khawvel inelna sang tak hmachhawn phâk zirlai chher chhuah ngei tum turin college-te a chah.

HTE Minister chuan, "Kum 1986-a Memo-randum of Settlement kan ziah zarah Mizoramin university kan neih phah a, vawiinah chuan India rama university ṭha pawl a tling ta. High court-te pawh hi MoU zara kan neih a ni a, tunah a building tur ṭha leh changtlung tak MINECO-ah sak mek a ni," a ti bawk.

Hostel hawnna inkhawm hi Serchhip College principal K Laldinpuii'n a kaihruai a, Serchhip bawrhsap Nazuk Kumar pawhin thu a sawi a ni.