Budget tharah sum dinhmun chhia siamṭhat tumna a awm lo - PC President

Peoples' Conference party president Vanlalruata chuan, Mizoram budget thar (2023-24)-ah Mizoram sum dinhmun chhia siamṭhat tumna hmuh tur a awm lo nia sawiin, budget thar chu lan mawi tumna budget dik lo niin a sawi.

PC party hruaitute chuan nimin khan Mizoram budget 2023-24 an thlirho a; Vanlalruata chuan, "Kan sum dinhmun chhiat chhoh zel laiin siamṭhat tumna hmuh tur a awm lo a, lan mawi tumin budget dik lo pharh zel a ni. Hetiang budget dik lo siam luih hian kan sum dinhmun a tichhe zual zel a, a pawi tak zet," a ti.

Vanlalruata chuan, sum hman ral thlawn (Revenue Expenditure) tur hriat lâwk sa tam tak budget estimate-ah tarlan a ni lo a, thup ṭhen hmangin pawisa chuang liam (revenue surplus) nei tur anga intarlan ṭhin a nih thu a sawi.

Budget hman lai (2022-23) chu a tìrah hlawh tak ngial pawh daih lo tura duan a nih thu an sawi ṭhin chu a nihna a lo lang chhuak ta tih sawiin Vanlalruata chuan, "Supplementary demand-ah hlawh atan cheng vbc. 215.81 dil belh a ni a, sum dil belh hi a vai chuan vbc. 3,265.69 niin, a tam tham hle. Hetianga lan mawi tuma budget dik lo siam a, tam tham tak tak siam rem (reappropriate) a ngai ṭhin hi tihtawp a ṭul tak meuh a ni," a ti.

PC President chuan, budget session neih mekah SEDP board-te hman atan Supplementary Demand-a cheng nuai 358.02 dil belh chu kum

2023-24 budget tharah tarlan a nih loh thu a sawi bawk.