Durtlang-Chaltlang cable car siamnaah awmze nei loin cheng vbc. 15.09 a rîral ; Central-in vbc. 31.14 project a hnuh kîr phah

Comptroller and Auditor General of India (CAG) chuan kum 2017 aṭanga Durtlang leh Chaltlang inkara cable car siamna leh bunna atan Mizoram sorkarin awmze nei loin cheng vbc. 15.09 a tih rîral thu a tarlang. Hei vang hian Durtlanga eco-adventure circuit project, cheng vbc. 31.14 hmanna tura pawm tawh leh sum dah tawh pawh Ministry of Tourism chuan April 2021 khan a hnûk kîr.

Report of the CAG of India on Social, Economic and Revenue Sectors for the year ended March 31, 2020-a tarlan danin, Mizoram sorkara Tourism department chuan Swadesh Darshan hnuaiah Eco-Adventure for Mamit - Aizawl atan March 2, 2017 khan detailed project report (DPR) sorkar laipuiah a thehlut.

Ministry of Tourism chuan Aizawl, Raw­puichhip, Khawhpawp, Lengpui, Durtlang, Chaltlang, Sakawrhmuituai tlang, Muthi, Berawtlang, Tuirial Airfield, Hmuifanga eco-adventure circuit siamna atan March 27, 2017-ah cheng vbc. 99.07 a pe a; hna thawh turte chu thla 30 chhunga zawha hawn tur a ni.

Sum sanction vbc. 99.07 aṭangin Tourism ministry chuan Swadesh Darshan hnuaiah sum hmanna tur hmun leh hlâwm ṭhen mumal awm loin cheng vbc. 49.53 a pe chhuak. Hna thawh tur component 16 zingah Durtlang atan cheng vbc. 31.14 dah a ni a, chutah chuan Durtlang leh Chatlang inkara cable car siamna tur cheng vbc. 24.83 a tel. Sorkar laipui chuan May 17, 2017-ah consultant a ruai a, rawih man cheng vbc. 2.97 a pe.

Mizoram Tourism Development Agency (MTDA) Member Secretary report (November-December 2020)-ah chuan, Durtlang-Chaltlang cable car project leh project component dangte siam hna thawk turin restricted tender hmangin August/ September 2017-ah contractor pahnih thlan a nih thu leh hnathawhte chu December 2018-ah zawh tura tih a nih thu tarlan a ni.

Durtlang-Chaltlang cable car (rope way) siamna atan September 2017 leh November 2018 inkarah contractor-te hnenah cheng vbc. 15.09 pek a ni. Component hrang hrang­ah contractor hnenah ṭum nga sum pek a ni a, mobilisation advance atan September 1, 2017-ah cheng nuai 276.83 pek a ni. Kum 2018 khan January 17-ah nuai 364.75, April 25-ah nuai 627.97, May 22-ah nuai 123.95 leh November 23-ah nuai 117.12 pek a ni bawk.

CAG-in an endiknaa a lan danin, Durtlang-Chaltlang cable car hian electric hrui, high power transmission line an tih 132 KV line pathum leh 11KV line leh low tension line eng emaw zat a paltlang dawn avangin September 12, 2018-ah Tourism department hotute leh Power & Electricity department leh Power Grid Corporation of India (PGCI) hotute an ṭhukhawm a; chutah chuan Durtlang-Chaltlang cable car siam chu tih chi-ah an ngai lo.

Cable car siamna tura DPR siamtu consultant-in DPR an siamah cable car (ropeway)-in 132 KV line pathum leh 11KV line leh LT line eng emaw zat a paltlang a ngai dawn tih a tarlang lo a, project chu tih theih a nih leh nih loh fiahna (feasibility report) sorkar laipuiah a thehlut lo. December 2019-a Ministry of Tourism report-ah pawh dan anga tih tur ṭulte leh thil tihhlawhtlin theih a nih leh nih loh zir chianna a awm lo tih tarlan a ni.

Hengte avangin Tourism Ministry chuan project pumpui (cable car chauh ni lo) tihkhawtlai a nih lohna turin Durtlang-Chaltlang inkara cable car siam bik chu project (pumpui) aṭangin a paih a; cable car siamna atana sum pek tawh cheng vbc. 15.09 chu hmu lêt/ rûl turin Mizoram sorkar a hriattir.

Cable car siamna atana sum pek tawh cheng vbc. 15.09 chu awmze nei loa a rîral avangin Ministry of Tourism chuan Durtlanga project dang, cheng vbc. 31.14 hmanna tura pawm tawh leh sum ruahman tawh pawh April 2021 khan a titawp zui bawk.

Ministry of Tourism-in March 27, 2017-a sum a peknaah, hna ṭan hmain state sorkar chu dan anga tihfel hmasak ngai zawng zawng tifel tura tih a ni. Tourism department Secretary kaihhruai Monitoring Committee din a, hna thawh dan te, sum hman dante vil tur leh thlen chinte (progress report) Ministry of Tourism hnenah thla thum danah (quarterly) thehlut tura tih a ni bawk.

Cable car (ropeway) siam tumnaah hian hna ṭan hmain thil tihpuitlin theih a nih leh nih loh zir chian hmasak a ni lo tih Mizoram sorkarin a pawm a; chumi hnuah February 2020 khan MTDA chuan cable car siam hna thawktu contractor chu cheng vbc. 12.22 Mizoram sorkara pe let tura a hriattir bakah, September 2020-ah insawifiah tura hriattirna (show cause notice) a pe a ni.

MTDA chuan, cable car project chu state sorkar sum aṭangin bawhzui theih a ni lo tih a tarlang a, contractor-in cheng vbc. 12.22 chu Mizoram sorkarah a pek let loh avangin Tourism department-in dan angin hmalakna (legal course) a kalpui thu a tarlang bawk.

Durtlang leh Chaltlang inkar ropeway siam turah awmze nei loa sorkar sum vbc. 15.09 a rîral chungchangah hian CAG chuan, project hna ṭan hmain dan anga phalna leh pawmpuina ṭul angte leh, project chu tihhlawhtlin theih a nih leh nih lohte zir chiang hmasa loa sorkar official-te'n thil an tih ṭhinte a awm tawh lohna tura hmalak a ṭul thu a tarlang a ni.